މައި ސަރުކާރުގެ ސިޔާސަތުތަކުގެ ސަބަބުން ކުންފުނިތައް ދައުލަތައް ބުރައަކަށް ވެފައިވާ ކަމަށް އިންތިހާބީ ރައީސްގެ އޮފީހުން ހާމަކޮށްފިއެވެ.
އިންތިހާބީ ރައީސްގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ޔޫޓިލީޓީސް ދައިރާގެ 4 ކުންފުންޏަކާއި ބެހޭ ގޮތުން ފާހަގަ ކުރެވުނު ބައެއް ކަންކަން ހިއްސާކޮށްފައިއެވެ. މީގެ ތެރެއިން މައިގަނޑުކޮށް ފާހަގަކޮށްފައިވަނީ ކުންފުނިތަކުގެ ދަރަނީގެ ހާލަތާއި، މާލީ އިދާރީ ހިންގުމުގެ ހަރުދަނާކަން ނެތުމުގެ އިތުރުން މައި ސަރުކާރުގެ ސިޔާސަތުތަކުގެ ސަބަބުން، ދައުލަތައް ބުރައަކަށް ކުންފުނިތައް ވެފައި ވުމަށެވެ.
މިކަންކަން ހައްލު ކުރުމަށް، އިންތިހާބީ ރައީސް އޮފީހުން ވިދާޅުވީ އައު ސަރުކާރުގައި 5 ކަމަކަށް އިސްކަން ދޭނެ ކަމަށެވެ.
- ކުންފުނިތައް އަމިއްލަ ފައިމައްޗަށް ކޮޅަށް ޖެހުން
- މާލީ އަދި އިދާރީ ހިންގުން ހަރުދަނާ ކުރުން
- އާންމު ކުދި ވިޔަފާރިތަކަށް އަދާ ކުރަން ޖެހޭ ފައިސާ އަދާކުރުން
- މުޅި "ޔޫޓިލިޓީ" ނިޒާމުގެ އޮނިގަނޑާއި މެދު އަލުން ވިސްނުން
- ހިނގަމުންދާ ޕްރޮޖެކްޓުތައް ބާރަށް ނިންމުން
އިންތިހާބީ ރައީސް އޮފީހުން ތަރުޖަމާނު މުހައްމަދު ފިރުޒުލް އަބްދުﷲ ޙަލީލް ވިދާޅުވީ، ކުންފުނިތައް ކޮޅަށް ޖެހުމަކީ އިންތިހާބީ ރައީސްގެ ސިޔާސަތެއް ކަމަށެވެ. އެގޮތުން ކޮންމެ ކުންފުންޏަކީވެސް އެކުންފުންޏަކަށް ލިބޭ އާމްދަނީން ހިންގޭ ކުންފުންޏަކަށް ހެދުމަށް އަމާޒު ހިފާކަމަށް ވިދާޅުވިއެވެ.
މީގެ އިތުރުން ކުންފިނިތަކުން ހަވާލުވާ މަޝްރޫޢުތައް ތާވަލަށް ނުނިންމި ދިގުލައި ދިއުމުން އިތުރު ޙަރަދުދާކަން ފާހަގަ ކުރައްވައި އެއް އަހަރުން އަނެއް އަހަރަށް މަޝްރޫޢުތައް 'ކެރީ ފޯވާޑް' ނުވާނެ ގޮތައް އިންތިޒާމުތައް ހަމަޖައްސަވަން ގަސްތު ކުރައްވާ ކަމަށް ވިދާޅުވިއެވެ. އަދި މިއީ ދަރަންޏަށް އިތުރުވާ ސަބަބެއް ގޮތުގައި އޭނާ ފާހަގަ ކުރެއްވިއެވެ.
"ޖުމްލަކޮށް ވިސްނާލާއިރު އަދި ފަހުން ފާހަގަ ކުރެވުނު ކަންކަމުގެ ތެރޭގައިވެސް، އެއް ތީމެއްގެ ގޮތުގައި އެންމެ ބޮޑަށް ފާހަގަ ކުރެވޭ ކަމަކީ، މުޢައްސަސާތަކުގައި އަދި އިދާރާތަކުގައި، ދައުލަތުގެ ލެވެލްގައިވެސް ފައިނޭންޝަލް މެނޭޖްމަންޓް އަދި ފިސްކަލް މެނޭޖްމެންޓުގެ ޑިސިޕްލިން ވަރަށް ބޮޑަށް ގެއްލިފައިވާކަން. ނަތީޖާއެއްގެ ގޮތުން އެވޮއިޑު ކުރެވޭނެ ގިނަ މައްސަލަތައް މިއަދު ކުރިމަތިވެފައި އެބަހުރިކަން ފާހަގަކުރެވޭ" ފިރުޒުލް ވިދާޅުވިއެވެ.
އޭނާ ވިދާޅުވި ގޮތުގައި މި ޑިސިޕްލިން އިޔާދަ ވުމަކީ އޭގެ ސަބަބުން ބޮޑެތި ހެޔޮ ބަދަލުތަކެއް ގެނެވޭނެ ކަމެކެވެ. އަދި ގަސްތު ކުރަނީ އެ މަގައް އިދާރީ ހިންގުން އަދި ކޯޕަރޭޓް ގަވަނެންސް ބައްޓަން ކުރުމަށް ކަމަށް ވިދާޅުވިއެވެ. އޭނާ މި ނުކުތާ ފަހާގަކޮށް އިތުރަށް ވިދާޅުވީ ސަރުކާރު ހިއްސާވާ ކުންފުނިތަކުގެ ތެރޭގައި އަމިއްލަ ފަރާތްތަުގެ ހިއްސާ އޮތް ކުންފުނިތައް ހިމެނޭ ކަމަށެވެ. އަދި އެކުންފުނިތަކުގެ ހިންގުން އެހެން ކުންފުނިތަކާއި ބަލައި ވަރަށް ބޮޑަށް ރަނގަޅު ކަމަށެވެ.
މިއާއެކު ކޯޕަރޭޓް ގަވަނެންސަށް ހެޔޮ ބަދަލުތަކެއް ގެނައުމަކީ ކުންފުނިތައް ކޮޅަށް ޖެހުމަށް ވަރަށް ބޮޑަށް މަގުފަހިވެގެންދާނެ ކަމެއްގެ ގޮތުގައި ފިރުޒުލް ފާހަގަ ކުރެއްވިއެވެ.