މާލޭގެ މޭޔަރު ކަމަށް ވާދަކުރައްވައި އެ އިންތިހާބު ކާމިޔާބު ވެސް ކުރައްވާނެ ކަމަށް ކުރީގެ ޕޮލިސް ކޮމިޝަނަރު ހުސައިން ވަހީދު ވިދާޅުވެއްޖެ އެވެ.
ހުސްވެފައިވާ މާލޭގެ މޭޔަރުގެ މަގާމަށް ވާދަކުރައްވާނެކަން އޭނަ އިއުލާންކުރެއްވީ މިދިޔަ މަހުގެ 12 ގަ އެވެ.
ހުސައިން މިއަދު ފޭސްބުކް ޕޯސްޓެއްގައި ވިދާޅުވީ "ޖެހިލުމެއް ނުވާ" ކަމަށާއި "އިންތިހާބު ކާމިޔާބު ކުރާނަން" ކަމަށެވެ.
"އަޅުގަނޑުގެ ތަސައްވަރެއް މާލެއަށް އެބައޮތް. ވަރަށް ހިތްދަތި ވާހަކަތައް ބައްދަލުވި ގިނަ ބަޔަކު ވަނީ ކިޔައި ދީފައި،" އޭނަ ވިދާޅުވި އެވެ. "އަޅުގަނޑުގެ ހުރިހާ ވަގުތެއް ހޭދަ ކުރާނީ މާލޭގައި ދިރިއުޅޭ ރައްޔިތުންގެ ދަތިތައް ލުއިކޮށް ދިނުމަށް ކުރެވެން ހުރި ކަންކަން ކުރުމުގައި. ހޮއްވަވާ ދެއްވާ."
މާލޭގެ މޭޔަރުގެ މަގާމު ހުސްވީ އެ މަގާމުގައި ކުރިން ހުންނެވި ޑރ. މުހައްމަދު މުއިއްޒު ރިޔާސީ އިންތިހާބުގައި ވާދަކުރައްވައި ކާމިޔާބު ކުރެއްވުމާ ގުޅިގެންނެވެ. އޭނަ މި މަހުގެ 17 ގައި ރައީސްކަމުގެ ހުވާކުރައްވާނެ އެވެ.
މާލޭގެ މޭޔަރު ކަމަށް ވާދަކުރައްވާނެ ކަމަށް އިއުލާންކުރައްވާފައިވާ ބޭފުޅުންގެ ތެރޭގައި މިހާރުގެ ޔޫތު މިނިސްޓަރު އަހުމަދު މަހުލޫފާއި ކުރީގެ އެޓާނީ ޖެނެރަލް އާޒިމާ ޝަކޫރު ހިމެނެ އެވެ.
މޭޔަރު ހޮވަން އިންތިހާބު ބާއްވާނެ ތާރީހެއް އިލެކްޝަން ކޮމިޝަން އީސީ) އިން އަދި އިއުލާނެއް ނުކުރެ އެވެ. އެކަމަކު ޖެނުއަރީގައި އެ އިންތިހާބު ބާއްވާނެ އެވެ.