މުވައްޒަފުންނާ ދޭތެރޭ ތަފާތު ކުރުންތަކެއް ގެންގުޅޭ ކަމަށާއި މަސައްކަތް ކުރާ ޑިޕާޓްމަންޓްގެ އިސްވެރިންގެ ފަރާތުން ޕްރެޝަރުތަކެއް ކުރިމަތިވަމުންދާ ކަމަށް ބުނެ މޯލްޑިވްސް ބްރޯޑްކާސްޓިން ކޯޕަރޭޝަން (އެމްބީސީ) ގެ ޓީވީއެމްގެ ނިއުސްކާސްޓަރުކަމުން ވަކިވި ހަދީޖާ އާނަސްތު ވީޓީވީގައި މަސައްކަތް ކުރަން ފަށައިފި އެވެ.
އާނަސްތުގެ ފޭސްބުކް ސްޓޭޓަސްގައި މިއަދު ބުނެފައި ވަނީ މަހުޖަނު ގާސިމް އިބްރާހީމްގެ ވީޓީވީގައި މަސައްކަތް ކުރަން ފަަށާފައިވާ ކަމަށެވެ. އެކަމަކު އެކަމާ ބެހޭ އިތުރު އެއްވެސް ވާހަކައެއް އޭނާ ބުނެފައެއް ނުވެ އެވެ.
އާނަސްތަކީ ޓީވީއެމުން ނިއުސްކާސްޓަރުން ތަމްރީނު ކުރަން ހިންގި ކޯސްތަކުގައި ބައިވެރިވެ، ކޯސް ފުރިހަމަކޮށް މިހާތަނަށް ވަޒީފާގައި ދެމިތިބި މަދު ޒުވާން އަންހެން ކުދިންގެ ތެރެއިން އެކެކެވެ.
އޭނާ ޓީވީއެމުން ވަކިވެފައި ވަނީ ގާތްގަނޑަކަށް ހައެއްކަ އަހަރު އެ ޗެނަލުގައި މަސައްކަތް ކުރުމަށް ފަހު އެވެ.