ރާއްޖޭގެ މަޝްހޫރު ކޮލެޖެއް ކަމަށްވާ ސައިރިކްސްގެ ވެރިޔާ އަހުމަދު ޝަރީފު (ސައިރިކްސް ޝަރީފު) ވެސް އަންނަ އަހަރުގެ މަޖިލިސް އިންތިހާބުގައި ވާދަކުރައްވަން ނިންމަވައިފި އެވެ.
އޭނަ އަކީ މޯލްޑިވްސް ނެޝަނަލް ޕާޓީ (އެމްއެންޕީ) ގެ ނައިބު ރައީސެކެވެ.
ޝަރީފު މަޖިލީހަށް ވާދަކުރައްވަން ނިންމެވިކަން ސޯޝަލް މީޑިއާގައި އިއުލާން ކުރައްވައި ވިދާޅުވީ އޭނަ ނިސްބަތްވާ އައްޑޫ ހުޅުދު ދާއިރާގެ ގޮނޑިއާއި މެދު ވިސްނަން ޖެހޭ ވަގުތު ކައިރިވެއްޖެ ކަމަށެވެ.
"ހުޅުދޫގެ ގޮނޑި އެއީ ކޮންމެވެސް ސިޔާސީ ލީޑަރަކަށް ތަބާވާ އަޅަކު ހޫނުކުރާ ގޮނޑިއަކަށް މި ފަހަރު ހަދައިގެން ނުވާނެ،" ޝަރީފު ވިދާޅުވި އެވެ. "ހުޅުދޫގެ ގޮނޑި ހުޅުދޫގެ ރައްޔިތުންގެ ބާރުހިނގާ ގޮނޑިއަކަށް މި ފަހަރު ހަދަން ވާނެ."
މަޖިލީހަށް ވާދަކުރައްވަން އޭނަ ނިންމެވި އިރު، ޝަރީފަކީ އައްޑޫގެ ތަރައްގީ އަށް ވަކާލާތުކުރާ އައްޑޫ ޑިވެލޮޕްމަންޓް އޭޑީސީ) ގައި ވެސް އިސްކޮށް އުޅުއްވާ ބޭފުޅެކެވެ.
ހުޅުދޫގެ މިހާރުގެ މެމްބަރަކީ އިލްޔާސް ލަބީބެވެ. އޭނަ އަކީ މިހާރު ދަ ޑިމޮކްރެޓްސްގެ މެންބަރެކެވެ.