ފަލަސްތީނަށް އެހީވާން ފައިސާ އެއްކުރުމުގެ ގޮތުން އައްޑޫގެ ދެ އަވަށެއްގައި މިއަދު އިވެންޓްތަކެއް ބާއްވަން ނިންމައިފި އެވެ.
އެގޮތުން މިއަދު ހަވީރު މަރަދު އާއި މީދޫގައި ހާއްސަ ހަރަކާތަކެއް އޮންނާނެ އެވެ. މަރަދޫ ބަނދަރު މަތީގައި ބާއްވާ ހަރަކާތުގައި ތަފާތު ތަކެތި ވިއްކައިގެން ފައިސާ އެއްކުރުން ކުރިއަށް ދާނެ އެވެ. މި އިވެންޓް ބާއްވަނީ މަރަދޫ އަވަށު އޮފީހާއި އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) އާ ޖަމިއްޔާއެއް ކަމަށްވާ ސްކީމްގެ އިތުރުން ހެޔޮއެދޭ އެކި ފަރާތްތަކުގެ އެހީތެރިކަމާ އެކީގަ އެވެ.
މި އިވެންޓުން ލިބޭ ފައިސާ ހަދިޔާކުރަން ނިންމާފައި ވަނީ ފަލަސްތީން ފަންޑަށެވެ.
މީދޫގައި މިއަދު ކުރިއަށް ގެންދާ ހަރަކާތް ދެ ދަންފަޅިއަކަށް ކުރިއަށް ގެންދާނެ އެވެ. އެއީ ހަވީރު 4:00-6:00 އަށް އަދި ރޭގަނޑު 8:00-10:00 އަށެވެ.
މިދިޔަ ހަފުތާގެ ހުކުރު ދުވަހު މީދޫގައި އިވެންތެއް ބާއްވައި 43،000 އަށް ވުރެ ގިނަ ރުފިޔާ ހޯދާފައިވެ އެވެ.
މާދަމާ ހަވީރު ފޭދޫގައި ވެސް ފަލަސްތީނަށް އެހީވާން އިވެންޓެއް ބާއްވާނެ އެވެ. އެ އިވެންޓް ކުރިއަށް ދާނީ އެ އަވަށު ދަނޑުގަ އެވެ.