ރާއްޖޭގެ ވަރިކަމާ ހަވާލުވެވަޑައިގަންނަވަން ތައްޔާރުވާ އާ ރައީސް ޑރ. މުހައްމަދު މުއިއްޒުގެ ސަރުކާރުން އިސްކަންދޭ ލިސްޓް ދިގު ނަމަވެސް އެ ލިސްޓްގައި ވައްކަމާއި ކޮރަޕްޝަނާ ހުއްޓުވުމުގެ ވާހަކައެއް ނެތް ކަމަށް މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެ އެވެ.
އޭނަ ސޯޝަލް މީޑިއާ ޕޯސްޓެއްގައި ވިދާޅުވީ "މުއިއްޒު އިސްކަންދޭ ކަންކަމުގެ ލިސްޓް ވަރަށް ދިގު" ކަމަށާއި އެކަމަކު "މިހާރު އިސްކަން ދޭ ލިސްޓުގައި ނެތީ ހަމައެކަނި ވައްކަމާއި ކަރަޕްޝަން ހުއްޓުވުން" ކަމަށެވެ.
އަންނަންހުރި ރައީސް @MMuizzu އިސްކަންދޭ ކަންކަމުގެ ލިސްޓް ވަރަށްދިގު. މިހާރު އިސްކަން ދޭލިސްޓުގަ ނެތީ ހަމައެކަނި ވައްކަމާ ކަރަޕްޝަން ހުއްޓުވުން.
— Mohamed Shifau (@mhshifau) November 3, 2023
ޝިފާއު މި މޭރުމުން ނިސްބަތްކުރި އިރު، މުއިއްޒު ކެމްޕޭން ތެރޭގައި ވިދާޅުވެފައިވާ ގޮތުގައި އެ މަނިކުފާނުގެ ސަރުކާރު ވަނީ ދެފުށް ފެންނަ ނަޒާހަތްތެރި ސަރުކާރަކަށެވެ. އަދި ސަރުކާރުގެ އިސް މަގާމުތަކުގައި ތިއްބަވާނީ ތައުލީމީ، ގާބިލު ބޭފުޅުން ކަމަށް ވެސް ވިދާޅުވެފައިވެ އެވެ.
މުއިއްޒު ވިދާޅުވެފައި ވަނީ އެ މަނިކުފާނުގެ ސަރުކާރުގައި ސިޔާސީ މަގާމުތައް 700 އަށް ވުރެ ގިނަ ވެސް ނުކުރައްވާނެ ކަމަށެވެ.
ރައީސް އިބްރާހީމް މުހައްމަދު ސޯލިހުގެ ވެރިކަމިގެ ދައުރު ހަމަވާ އިރު، މި ސަރުކާރަށް ވައްކަމާއި ކޮރަޕްޝަންގެ ތުހުމަތުތައް އިދިކޮޅު ފަރާތްތަކުން ފާހަގަކޮށްލެވެ އެވެ. އަދި ފާހަގަކޮށްލެވޭ ކަމަކީ މުއިއްޒު ނިސްބަތްވާ ޕީޕީއެމް/ޕީއެންސީގެ ކޯލިޝަނުން ކުރިން ވެރިކަން ކުރި އިރު، ރާއްޖޭގައި މިހާތަނަށް ހިންގާފައިވާ އެންމެ ބޮޑު ހިޔާނާތް ހިންގާފައިވާކަމެވެ. ކުރީގެ ރައީސް އަބްދުﷲ ޔާމީނު ތަންފީޒު ކުރައްވަމުން ގެންދަވާ 11 އަހަރުގެ ޖަލު ހުކުމަކީ ވެސް އެފަދަ މައްސަލައެއްގައި ކުށް ސާބިތުވެގެން އިއްވި ހުކުމެކެވެ.