ދަރްމާ ޕްރޮޑަކްޝަންގެ "ބްރަދާސް"ގެ ފުރަތަމަ ޕޯސްޓަރު މިއަދު އާންމުކޮށްފި އެވެ.
އެ ފިލްމުގެ ރަސްމީ ޓްވިޓާ މެދުވެރިކޮށް އާންމު ކުރި ޕޯސްޓަރުން ފެންނަނީ ފިލްމުގެ ލީޑް ރޯލް ކުޅޭ އަކްޝޭ ކުމާރާއި ސިދާތު މަލްއުތުރާގެ އިތުރުން ޖެކީ ޝްރޮފް އެވެ.
މި ފިލްމުގެ ބަތަލާއަކީ ޖެކޮލިން ފެނާންޑޭޒެވެ.
މީޑިއާ ރިޕޯޓްތައް ބުނާ ގޮތުން އަކްޝޭ އާއި ސިދާތު ދެބޭންގެ ރޯލުން ފެނިގެންދާ އިރު، ޖެކޮލިން ފެނިގެން ދާނީ އަކްޝޭގެ އަންހެނުންގެ ރޯލުންނެވެ.
ކަރަން ޖޯހަރު ޕްރޮޑިއުސްކޮށްފައިވާ "ބްރަދާސް" ޑައިރެކްޓްކޮށްފައި ވަނީ ދަރްމާގެ "އަގްނީޕަތު" ގެ ޑައިރެކްޓަރު ކަރަން މަލްއުތުރާ އެވެ. މިއީ އޭނާގެ ދެވަނަ ޑައިރެކްޝަނެވެ. އަދި މިއީ އަކްޝޭ ދަރްމާ އަށް ކުޅޭ ދެވަނަ ފިލްމެވެ.
ކަރަން ޖޯހަރު 2012 ގައި ގެނެސް ދިން "ސްޓޫޑަންޓް އޮފް ދި އިޔާ" އިން ބޮލީވުޑަށް ނިކުތް ސިދާތުގެ މިއީ ދަރްމާގެ ދެވަނަ ފިލްމެވެ.
މި ފިލްމަކީ 2011 ވަނަ އަހަރު ރިލީޒް ކުރި ހޮލީވުޑްގެ ފިލްމް "ވޮރިއާ" ގެ އޮފިޝަލް ރިމެކިންއެކެވެ.
ކަރީނާ ކަޕޫރު އައިޓަމް ލަވައަކުން ވެސް ފެނިގެންދާ "ބްރަދާސް" ސިނަމާތަކަށް އަންނާނީ އޮގަސްޓް 14 ގަ އެވެ.
މި ފިލްމުގެ ޕޯސްޓަރު އާންމު ކުރި ނަމަވެސް ޓްރެއިލާ ބެލުންތެރިންނާ ހަމައަށް އަންނާނެ އިރެއް އަދި ނޭނގެ އެވެ.