ސަރުކާރުގެ ގެދޮރުވެރިޔާ ސްކީމުގެ ދަށުން މާލެ ސަރަހައްދުން ފްލެޓް ލިބޭ މީހުންގެ ދާއިމީ ލިސްޓު އާންމުކޮށްފިއެވެ.
މިއަދު ފްލެޓު ލިބޭ މީހުންގެ ދާއިމީ ލިސްޓް އާންމުކޮށްފައިވާއިރު، ޕްލޭނިންގް މިނިސްޓްރީން ބުނީ ދާއިމީ ލިސްޓުގައި ހިމެނޭ މީހުންގެ ތެރެއިން މިހާރު ސަރުކާރުން އަޅަމުންދާ 4000 ފްލެޓު ލިބޭ މީހުން ކަނޑައާޅާނީ ލިބުނު ޕޮއިންޓަށް ބަލާފައެވެ. އެގޮތުން 3 ކޮޓަރީގެ އެޕާޓްމެންޓަށް ކުރިމަތިލާފައިވާ ފަރާތްތަކުގެ ތެރެއިން ގުރުލުމަށް ދާނީ 76 ޕޮއިންޓް ނުވަތަ އެއަށް ވުރެ މަތިން ލިބިފައިވާ ފަރާތްތައް ކަމަށް މިނިސްޓްރީން ބުނެއެވެ. އަދި 2 ކޮޓަރީގެ ފްލެޓުތަކަށް ގުރުލުމުގައި ބައިވެރިވެވޭނީ 73 ޕޮއިންޓަށް ވުރެ ގިނައިން ލިބިފައިވާ ފަރާތްތަކެވެ.
ދައިމީ ލިސްޓުގައި ހިމެނޭ މި 4000 ފްލެޓުގެ ހައްޤުވެރިންގެ މެދުގައި ގުރުލުން ކުރިއަށް ގެންދާ ދުވަހާއި ގަޑި ޕޯޓަލް މެދުވެރިކޮށް އަންގާނެ ކަމަށް މިނިސްޓްރީން ވަނީ ބުނެފައެވެ. މީގެ ތެރެއިން ދެމަފިރިން ވަކިން ހުށަހަޅައިގެން ފުލެޓް ލިބުމަށް ހޮވިފައިވާނަމަ ފުލެޓް ދިނުމަށް ހަމަޖެހިފައިވަނީ ދެމަފިރިންނަށް 1 ފުލެޓެވެ. އެހެން ކަމުން ދެމަފިރިންގެ ތެރެއިން އެއް ފަރާތެއް ފްލެޓު ދޫކޮށްލަން ޖެހޭނެއެވެ.
މީގެ އިތުރުން މިހާރު އަޅަމުންދާ 4000 ފްލެޓު ލިބޭފަރާތްތަކުގެ ތެރޭގައި ނުހިމެނޭ އެހެން ނަމަވެސް ޝަރުތުހަމަވާ ފްލެޓު ފަރާތްތަކަށް ސަރުކާރުގެ ބޯހިޔާވަހިކަމުގެ މަޝްރޫއުތަކުގެ ތެރެއިން ފްލެޓު ދިނުމަށް ނިންމާފައިވާ ކަމުގެ ލިއުން ޕޯޓަލް މެދުވެރިކޮށް ދޭނެ ކަމަށް ޕްލޭނިންގް މިނިސްޓްރީން ބުނެއެވެ.
މި ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން މިވަގުތު މަސައްކަތް ފެށި ނިމެން ދަނީ 4000 ފްލެޓުގެ މަސައްކަތެވެ. ފަހި ދިރިއުޅުން ކޯޕަރޭޝަންގެ ބެލުމުގެ ދަށުން ކުރިއަށްދާ މި ފްލެޓުތަކުގެ އިތުރަށް 4000 ފްލެޓު އެޅުމަށް ސަރުކާރުން ވަނީ އިންޑީއާ ކުންފުންޏަކާއި ހަވާލުކޮށްފައެވެ. ނަމަވެސް އެކަމުގެ ޢަމަލީ މަސައްކަތް ފެށިފައި ނުވާއިރު، އެކަން ކުރިއަށް ގޮސްފައިވާ ހިސާބެއް ސަރުކާރުން އަދި ހާމަކޮށްފައި ނުވެއެވެ.