ސެޕްޓެމްބަރުގައި ހުޅުވި އިފުރު އައިލޭންޑް ރިސޯޓުން ޓޫރިސްޓުންނަށް ސްކައިޑައިވިންގެ ހިދުމަތް ރަސްމީކޮށް ދޭން ތައްޔާރުވެއްޖެ އެވެ.
މިކަމަށް ހާއްސަކޮށްގެން އެ ރިސޯޓުން ވަނީ ހަ މީހުންގެ ޖާގައިގެ ސެސްނާ 208ބީ މަރުކާގެ ބޯޓެއް ގެނެސްފަ އެވެ. މިދިޔަ ހުކުރު ދުވަހު އެ ބޯޓް ގެނައީ އިނގިރޭސިވިލާތުންނެވެ. އިފުރު އިން ބުނީ މި ބޯޓަކީ ސްކައިޑައިވިން އަށް ހާއްސަ ހުރިހާ އާލާތްތަކެއް އެކުލެވޭ ބޯޓެއް ކަމަށާއި ސްކައިޑިންގެ ހިދުމަތަށް ރިސޯޓް އޮތީ ވަރަށް ބޮޑަށް ތައްތާރުވެފައި ކަމަށެވެ.
އެ ރިސޯޓުން ޓޫރިސްޓުންނަށް ދޭ ހިދުމަތެއްގެ ގޮތުގައި ސްކައިޑައިވިން ތައާރަފުކުރި އިރު، މިއީ ރާއްޖޭގެ ރިސޯޓަކުން ދާއިމީކޮށް މި ހިދުމަތް ދޭން ފެށި ފުރަތަމަ ފަހަރު ވެސް މެ އެވެ. އިފުރުގެ ސްކައިޑައިވިން ހަރަކާތްތައް މެނޭޖްކުރަން ހަވާލުކޮށްފައި ވަނީ އެ ދާއިރާ އިން 20 އަހަރުގެ ތަޖުރިބާ ހުރި އިނގިރޭސި ރައްޔިތެއް ކަމަށްވާ ވިލް ޕެނީއާ އެވެ. އޭނައާ އެކީ ފެންވަރު ރަނގަޅު ޓީމެއް މަސައްކަތް ކުރާނެ އެވެ.
އިފުރުގައި ސްކައިޑައިވިންގެ ހިދުމަތް ދެނީ އިނގިރޭސިވިލާތުގެ އެލީޓް އިންޑޯ ސްކައިޑައިވިން ކުންފުނި، އައިފްލައި ލަންޑަނާ ގުޅިގެންނެވެ.
އިފުރު އައިލޭންޑް ރިސޯޓުން ބުނީ ސްކައިވިން ތައާރަފުކުރުމާ އެކީ މި މަހުން ފެށިގެން އަންނަ އަހަރުގެ މާޗާ ހަމައަށް ޓޫރިސްޓުނަށް މުޅިން ހިލޭ ސްކައިޑައިވިން ތަޖުރިބާކޮށްލެވޭނެ ކަމަށެވެ.
View this post on Instagram
އިއްޔެ ރިސޯޓުން ވަނީ ސްކައިޑިވިން ހަރަކާތްތަކެއް ވެސް މީޑިއާ އިވެންޓެއްގެ ގޮތުގައި ބާއްވައިފަ އެވެ.
ރ. އަތޮޅުގައި ތަރައްގީކޮށްފައިވާ އިފުރު އައިލޭންޑް މޯލްޑިވްސް ރިސޯޓަކީ 147 ވިލާގެ ލަފްޒަރީ ރިސޯޓެކެވެ.