ޑްރޯން ރޭހެއް ވެސް ހިމެނޭ ގޮތަށް މި އަހަރު އުރީދޫ "ފަން ރަން" އަންނަ މަހު ހުޅުމާލޭގައި ބާއްވަން ނިންމައި، ރަޖިސްޓްރީވުމުގެ ފުރުސަތު ހުޅުވާލައިފި އެވެ.
ރަޖިސްޓްރީވެވޭނީ މި މަހުގެ 30 ގެ ނިޔަލަށެވެ.
އުރީދޫން ބުނީ އަންނަ މަހުގެ "ފަން ރަން" ވާނީ ރާއްޖޭގައި ބާއްވާ އެންމެ ފުރަތަ ޑްރޯން ރޭސް، "އުރީދޫ ޑްރޯން ރޭސް" ފެނިގެންދާނެ އިވެންޓަކަށް ކަމަށެވެ.
މި އިވެންޓް އަންނަ މަހުގެ 22 ގައި ބާއްވަން ރާވާފައިވާ އިރު، ޑްމިކަމާ ގުޅޭ އިތުރު މައުލޫމާތު ވަރަށް އަވަހަށް އާންމުކުރާނެ އެވެ. މި ރޭހުގެ އެއްވަނަ ވަރަށް ހާއްސަ އިނާމެއް ލިބޭނެ އެވެ. ރޭހުގެ ބައިވެރިންގެ އަމާޒަކަށް ވާން ވާނީ ހުރަސްތަކާއި ހޫޕްތައް ހިމެނޭ ގޮތަށް ފަރުމާކޮށްފައިވާ ޑްރޯން ރޭސިން ޓްރެކުގައި ވާދަކޮށް އެންމެ އަވަހަށް ނިންމުން ކަމަށް އުރީދޫން ބުންޏެވެ.
އުރީދޫ "ފަން ރަން" އަކީ 6 އަހަރުން މަތީގެ މީހުންނަށް ހާއްސަ އިވެންޓެކެވެ. ތަފާތު ހަރަކާތްތަކެއް ހިމެނޭ 5 ކިލޯމީޓަރުގެ މިކުރު ދުވުމަކީ އަލަށް ދުވާ ފަރާތްތަކާއި އާއްމުކޮށް ދުވާ ފަރާތްތަކަށްވެސް ބައިވެރިވުމަށް މަޖާވާނެ ދުވުމެއްކަމަށް އުރީދޫން ބުންޏެވެ.
"ފަން ރަން" ގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައި ދިނުމެވެ.
"ފަން ރަން" ގެ ކިޓްތައް ލިބޭނީ ދެ ކެޓަގަރީއަކުންނެވެ. އެއީ ސްޓޭންޑަޑް ކިޓްސް އަދި ފަން ކިޓްސް ކެޓަގަރީއެވެ. ސްޓޭންޑަޑް ކިޓްގައި ފަން ރަން ޓީޝާޓް އަދި ރިސްޓްބޭންޑް ހިމެނޭ އިރު އަގަކީ 100ރ. އެވެ. ފަން ކިޓްގައި އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި، ފޮތި ދަބަސް އައިނު ހިމެނޭ އިރު، އަގަކީ 200ރ. އެވެ.