ޔޫއޭއީ ސަރުކާރުގެ ދައުވަތަކަށް އިންތިހާބީ ރައީސް ޑރ. މުހައްމަދު މުޢިއްޒު ޔޫއޭއީއަށް ފުރާވަޑައިގެންފިއެވެ.
އިންތިހާ ރައީސް މިއަދު އަބޫ ދާބީ ފުރާ ވަޑައިގެންފައިވާ ކަން އިންތިހާބީ ރައީސް އޮފީހުން ވަނީ މިޑިއާތަކަށް ކަށަވަރުކޮށްދީފައެވެ. އަދި މި ދަތުރުފުޅުގެ ޙަރަދުތައް ހަމަޖައްސަވަނީ ޔޫއޭއީ ސަރުކާރުން ކަމަށް އިންތިހާބީ ރައީސް އޮފީހުން ހާމަކުރައްވައެވެ. ނަމަވެސް ދަތުރުފުޅާއި ގުޅޭ އެއްވެސް އިތުރު ތަފްސީލެއް އެއޮފީހުން ހާމައެއް ނުކުރައްވައެވެ.
އިންތިހާބީ ރައީސް، ޑރ. މުޢިއްޒު އަބޫ ދާބީ އަށް ފުރާ ވަޑައިގެންފައިވާއިރު، އެމަނިކުފާނު ވަނީ އިންތިހާބު ވުމަށް ފަހު ސިންގަޕޫރަށްވެސް މިދިޔަ ހަފްތާގައި ވަޑައިގެންފައެވެ. އެދަތުރުފުޅުގައި ޕާޓީ ލިޑާޝިޕްގެ ބައެއް ބޭފުޅުން ބައިވެވެ ވަޑައިގެންނެވިއެވެ.
މި މަހުގެ 17 ވަނަ ދުވަހު ހުވާ ކުރައްވާ އިންތިހާބީ ރައީސް، ކެމްޕެއިން ތެރޭގައި ވަނީ އަރަބި ޤައުމުތަކާއި ހާއްސަކޮށް އިސްލާމީ ޤައުމުތަކާއި ގާތް ގުޅުމެއް ބާއްވާނެ ކަމަށް ވިދާޅުވެފައެވެ.
ޔޫއޭއީ އަކީ ރާއްޖޭގައި ތަރައްޤީއަށް ގިނަ އެހީތަކެއް ވެދިފާއިވާ ޤައުމަކެވެ. މިގޮތުން މާފަރު އެއާޕޯޓަކީ އަބޫ ދާބީގެ އެހީތެރިކަމާއި އެކު ތަރައްޤީކޮށްފައިވާ އެއާޕޯޓެކެވެ. އަދި މިމަޝްރޫޢު އިތުރަށް ފުޅާ ކުރުމަށް ވަނީ މަޝްވަރާ ކުރެވި އެކަމުގެ މަސައްކަތްވެސް ފެށިފައެވެ. މީގެ އިތުރުން ވެލާނާ އެއާޕޯޓު ތަރައްޤީ ކުރުމުގެ މަޝްރޫޢަށްވެސް އަބޫ ދާބީ ފަންޑުން އެހީ ލިބިފައިވެއެވެ.