ހިތަދޫގެ ދެ ސަރަޙައްދެއްގައި މަސް މާރުކޭޓް ގެ ޚިދުމަތް ދޭން އައްޑޫ ސިޓީ ކައުންސިލުން ނިންމައިފި އެވެ.
އެގޮތުން ހިތަދޫ ބަނދަރު ސަރަޙައްދުގައި މަސް މާރުކޭޓެއް އަމިއްލަ ތަކެތީގައި ކައުންސިލުން ދައްކާ މިންގަނޑުތަކަށް ޢިމާރާތްކޮށް ދިނުމަށް ހުޅުވާލަން ވަނީ ނިންމައިފަ އެވެ.
އެތަނުގައި ހުންނަނަ ޖެހޭ ވަސީލަތްތަކުގެ ތެރޭގައި:
* މަސް މާރުކޭޓުގައި މަދުވެގެން ހަ ފަރާތަށް މަސް ކަނޑަން ތިބެވޭނެ އިންތިޒާމް ހަމަޖެހިފައިވުން.
* ފެން ލިބޭނެ އިންތިޒާމް ހަމަޖެހިފައި ހުރުން.
* މަސްވެރިންނާއި ދަތުރުވެރިންނާއި އެ ސަރަޙައްދު ބޭނުން ކުރާ ފަރާތްތަކަށް ފާޚާނާއަކާއި، ފެންވެރޭނެ އިންތިޒާމް ހަމަޖެހިފައި ހުރުން.
* އެ ސަރަހައްދު ބޭނުން ކުރާ ފަރާތްތައް މަޑުކޮށްލާނެ ފިނި މައިޒާނެއް ހުރުން ހިމެނެ އެވެ.
ހިތަދޫ ފަތާ ސަރަޙައްދު ކައުންސިލުން ން ދައްކާ ގޮތަކަށް ތަރައްޤި ކުރުމާއި، ފަތާ ސަރަހައްދު ބެލެހެއްޓުމާ އެކު ހިތަދޫ ކުޑަކުދިންގެ ޕާކްގެ އިރުން އޮތް ސަރަހައްދުގައި މަސް މާރުކޭޓެއް ކައުންސިލް އިން ދައްކާ މިންގަނޑު ތަކަކަށް އަމިއްލަ ތަކެތީގައި ޢިމާރާތްކޮށް ދޭނެ ފަރާތެއް ހޯދުން ވެސް ހިމެނެ އެވެ.
އެތަނުގައި ހުންނަން ޖެހޭ ވަސީލަތްތަކުގެ ތެރޭގައި:
* މަސް މާރުކޭޓުގައި މަދުވެގެން ދެ ފަރާތަށް މަސް ކަނޑަން ތިބެވޭނެ އިންތިޒާމް ހަމަޖެހިފައިވުން.
* ފެން ލިބޭނެ އިންތިޒާމް ހަމަޖެހިފައި ހުރުން.
* މަސްވެރިންނާއި ދަތުރު ވެރިންނާއި، އެ ސަރަޙައްދު ބޭނުންކުރާ ފަރާތްތަކަށް ފާޚާނާއަކާއި، ފެންވެރޭނެ އިންތިޒާމް ހަމަޖެހިފައި ހުރުން.
* އެ ސަރަހައްދު ބޭނުން ކުރާ ފަރާތްތައް މަޑުކޮށްލާނެ ފިނި މައިޒާނެއް ހުރުން. (ޢާއްމުންނަށް ތިބެވޭ ގޮތަށް ފަރުމާކޮށް ތައްޔާރުކުރެވިފައިވާ ތަނެއް ހުރުން)
މި މަސައްކަތްތައް ކޮށްދޭނެ ފަރާތަކަށް ހިތަދޫ ބަނދަރު ސަރަހައްދުން ވިޔަފާރި ކުރުމަށް 6،000އަކަފޫޓުގެ ބިމެއް، 15 އަހަރު ދުވަހުގެ މުއްދަތަށް ކުއްޔަކާއި ނުލައި ދޫކޮށް، އަދި ކުޑަކުދިންގެ ޕާކުގެ އިރުން 4،000 އަކަފޫޓުގެ ބިމެއް 15 އަހަރުގެ މުއްދަތަށް ދޫކުރުމުގައި ފުރަތަމަ 10 އަހަރު ދުވަހަށް ކުއްޔަކާއި ނުލައި، އަދި ފަހު ފަސް އަހަރު ކުލި ނަގައިގެން ދޫކުރުމަށް ދޭން ވަނީ ނިންމައިފަ އެެވެ.
އަދި މި ދެސަރަހައްދުގައި ޤާއިމު ކުރެވޭ މަސް މާރުކޭޓް މެނޭޖްކޮށް ދިނުމަކީ ވެސް މަސައްކަތް ކޮށްދޭ ފަރާތުން ކުރަން ޖެހޭ ކަމެކެވެ.
އެގޮތުގެ ހިތަދޫން ކަނޑައެޅިފައިވާ ދެ ސަރަޙައްދުގައި އަމިއްލަ ތަކެތީގައި ކައުންސިލްއިން ކަނޑައަޅާ މިންގަނޑުތަކަށް ޢިމާރާތް ކޮށްދޭނެ ފަރާތެއް ހޯދުމަށް ޢާއްމުކޮށް އިޢުލާނުކޮށް އެންމެ ރަނގަޅު ޕްރޮޕޯސަލް ހުށަހަޅާ ފަރާތަކާއި މަސައްކަތް ޙަވާލު ކުރާނެ ކަމަށް ކައުންސިލުން ބުންޏެވެ.
ޕްރޮޕޯސަލް ތަކަށް ޕޮއިންޓް ދިނުމުގައި ހުށަހެޅުމަށް 55 ޕަސެންޓް، މާލީ ގާބިލް ކަމަށް 25 ޕަސެންޓް މުއްދަތަށް 15 ޕަސެންޓް އަދި ތަޖްރިބާ އަށް 5 ޕަސެންޓް ދެވޭނެ އެވެ.
ހިތަދޫ ބަނަދަރު ސަރަޙައްދުގައި ޤާއިމު ކުރެވޭ ތަނަށް "ހިތަދޫ މަސް މާރުކޭޓް" ގެ ނަމުން ނަން ދިނުމަށާއި، ކުޑަކުދިންގެ ޕާކް ސަރަޙައަދުގައި ޤާއިމު ކުރެވޭ ތަނަށް "ހިތދޫ މަސްވެރިންގެ ޕާކް" ގެ ނަމުން ނަން ދިނުމަށް ވެސް ވަނީ ނިންމައިފަ އެވެ.