ގައުމީ ޔުނިވަސިޓީގެ ލެކްޒަރާއެއް ކަމަށްވާ އަލީ ހަފީޒްގެ އެކްސިޑެންޓާ ގުޅިގެން، ސައިކަލު ދުއްވި ޒުވާނާ އަށް އެއް އަހަރާއި ދިހަ މަހާއި 29 ދުވަހުގެ ޖަލު ހުކުމެއް ކްރިމިނަލް ކޯޓުން އިއްޔެ އިއްވައިފި އެވެ.
ހަފީޒަށް ބޮޑެތި އަނިޔާތަކެއް ލިބުނު އެ ހާދިސާއާ ގުޅިގެން ޖަލު ހުކުމެެއް އިއްވީ ރ. އިނގުއިދޫ، ޝަމްއާން އަބްދުއްޝުކޫރު، 22، ގެ މައްޗަށެވެ. އޭނާގެ މައްޗަށް ދައުލަތުން އުފުލީ މީހަކަށް އަނިޔާއެއް ދިނުމުގެ ކުށުގެ ދައުވާ އެވެ. އެ ކުށަށް ޝަމްއާން ތަހުގީގުގައި އިއުތިރާފުވެ ދައުލަތާ އެކު އިއުތިރާފުވެ އެއްބަސްވުމެއް ވެސް ހެދި އެވެ.
ޝަމްއާން ބާރު ސްޕީގައި ދުއްވިު ސައިކަލުން ހަފީޒުގެ ގައިގައި ޖެހުނީ ޖޫން މަހުގެ 28 ވަނަ ދުވަހު ހީނާމާގޭ ޕާކިން ޒޯނު ކައިރީގައި ހުންނަ މިސްކިތުން ފަތިސް ނަމާދުން ފައިބައިގެން ކަފިހި ހުރަހުން މަގު ހުރަސް ކުރަނިކޮށެވެ. މި ހާދިސާ ހިނގި އިތި ޝަމްއާންގެ އަތުގައި ލައިންސަންސް ވެސް ނެތެވެ.
އެކްސިޑެންޓުގައި ހަފީޒުގެ ބޮލަށާއި މޫނަށް ވަނީ ސީރިއަސް އަނިޔާތަކެއް ލިބި، ރާއްޖެ އިން ބޭރުން ވެސް ފަރުވާ ހޯދި އެވެ.