އެ ކޮމިޝަނުން ތަހުޤީޤު ކުރަމުންދާ މައްސަލައަކާއި ގުޅިގެން އެންޓި ކޮރަޕްޝަން ކޮމިޝަން (އޭސީސީގެ) ޓީމެއް އާބަންކޯއަށް ވަދެފިއެވެ.
އާބަންކޯއަށް އޭސީސީގެ ޓީމެއް ވަދެފައިވަނީ ސީދާ ކޮން މައްސަލައަކާއި ގުޅިގެން ކަމެއް އެ ކޮމިޝަނުން ރަސްމީކޮށް މިހާތަނަށް ހާމައެއް ނުކުރެއެވެ. ނަމަވެސް މައުލޫމާތު ލިބިފައިވާ ގޮތުގައި އާބާންކޯ އޮފީހަށް އޭސީސީގެ ޓީމެއް ވަދެފައިވަނީ ހުޅުމާލެއިން ބިންތަކެއް ވިއްކުމުގެ މަސައްކަތް ކުރިއަށް ގެންދާތީއެވެ.
އިންތިޤާލީ މަރުހަލާގައި ބިންތަކުގެ ވިޔަފާރި މުޢާމަލާތް ކުރިއަށް ނުގެންދިއުމަށް އޭސީސީން މިދިޔަ ހަފްތާގައި ވަނީ އާބަންކޯއަށް އަންގާފައެވެ. އޭސީސީގެ މި އެންގުން އައިސްފައިވަނީ އިންތިހާބީ ރައީސް އޮފީހުން މިކަމުގެ ކަންބޮޑުވުން ފާޅުކޮށްފައި ވަނިކޮށެވެ.
އެގޮތުން އެއޮފީހުން އޭރު ނެރެފައިވާ ބަޔާނުގައި ހުޅުމާލޭގެ ބިންތަކަކީ ދިވެހި ދައުލަތުގެ ރައުސްމާލުގައި ހިމެނޭ އެންމެ އަގު ބޮޑު އެސެޓްތައް ކަމުން އިންތިގާލީ މަރުހަލާގައި އަވަސް އަރުވާލައިގެން އެ ބިންތަކާ ގުޅޭ ވިޔަފާރީގެ މުއާމަލާތްތައް ހިންގުމަކީ އެ އޮފީހުން ކަންބޮޑުވާ ކަމެއް ކަމަށެވެ. އަދި ވަކިން ހާއްސަކޮށް މި މުއާމަލާތްތަކުގެ ތެރޭގައި ބޭރުގެ ފަރާތްތަކަށް ބިން "ލީޒް"ކުރުމުގެ މުއާމަލާތްތަކެއް ހިމެނޭތީ އެއީ ވަކިން ބޮޑަށް ކަންބޮޑުވާ މައްސަލައެއް ކަމަށްވެސް ބުންޏެވެ.
އިންތިހާބީ ރައީސް އޮފީހުން ތުހުމަތުކޮށްފައިވަނީ އަވަސް އަރުވާލައިގެން ނާޖައިޒް ފައިދާ ލިބޭ ގޮތަށް ހުޅުމާލެއިން ބިންތަކެއް ވިއްކުމަށް އާބަންކޯއިން މަސައްކަތް ކުރާ ކަމަށެވެ. ނަމަވެސް އެކަމުގައި އާބަންކޯއިން ރަސްމީކޮށް އެއްވެސް އެއްޗެއް ބުނެފައި ނުވެއެވެ.