ޤައުމީ މަސް ކުންފުނިން މިފްކޯއިން މަސް ގަންނަ އަގު ރިވިއު ކުރުމަށް ސީދާ މަޝްވަރާ ކުރަމުން ނުދާ ކަމަށް މިފްކޯއިން ބުނެފިއެވެ.
މިފްކޯއިން މިހެން ބުނެފައި މިވަނީ އެކުންފުނީގެ ސީއީއޯ އިސްމާއިލް ފައުޒީ ބައެއް މީޑިއާތަކާއި ވާހަކަ ދައްކަވަމުން މަހުގެ އަގު ރިވިއު ކުރުމަށް ފިނޭންސް މިނިސްޓްރިއާއި މަޝްވަރާ ކުރަމުންދާ ކަމަށް ބުނެފައިވަނިކޮށެވެ. މިކަމާއި ގުޅިގެން މަސްވެރިންގެ ކަންބޮޑުވުން ފާޅުކޮށްފައިވާއިރު، މިފްކޯއިން ވަނީ މަހު އަގު ކުޑަ ކުރުމުގެ އެއްވެސް ވިސްނުމެއް ނުގެންގުޅޭ ކަން ހާމަކޮށް ނޫސްބަޔާނެ ނެރެފައެވެ.
މިފްކޯގެ ނޫސްބަޔާނުގައި ބުނީ، ސަރުކާރުން މަސް ގަންނަ އަގު 17ރ. އިން 25ރ. އަށް ބަދަލު ކުރީ، އީޔޫ މާކެޓަށް ވިއްކާ މަހުން ނަގަމުން އަނަން 22 އިންސައްތަ ޑިއުޓީ ކަނޑާލުމަށް މަޝްވަރާތައް ޕޮޒިޓިވްކޮށް ކުރިއަށް ގެންދެވިފައިވާތީ ކަމަށެވެ. އެދުވަހުން ފެށިގެން ސަރުކާރުން ނިންމާފައިވާ އަގުގައި މަސް ގަންނަމުންދާ ކަން މިފްކޯއިން ފާހަގަ ކުރެއެވެ. އަދި މި އަގު ކުޑަ ކުރުމަށް އެއްވެސް ވިސްނުމެއް ނެތް ކަމަށް ބަޔާނުގައި ބުންޏެވެ.
"އަދި މަހުގެ އަގު ރިވިއު ކުރުމަށް، ފިނޭންސް މިނިސްޓްރީއާއި ސަރުކާރުގެ އެއްވެސް އިދާރާއަކާއިއެކު، މިފްކޯއިން ސީދާ މަޝްވަރާއެއް ކުރަމުން ނުގެންދާކަމުގެވެސް ދަންނަވަމެވެ. މިއާއެކު މަސްކިރައި އަގު ނުދެވި ހުރި ހުރިހާ ފައިސާއެއް މަސްވެރިންނަށް ދައްކައި ޙަލާސް ކުރުމަށް ކުރަން ޖެހޭ މަސައްކަތް މިދަނީ ގުޅުންހުރި ފަރާތްތަކާއި އެކު ކުރަމުންނެވެ. " މިފްކޯ ބަޔާނުގައި ވެއެވެ.
މިފްކޯއިން ވަނީ މަސްވެރިން އަތުން މިފްކޯއިން ގަނެފައިވާ މަހަށް ބަރާބަރަށް ފައިސާ ދައްކާނެ ކަމުގެ ޔަޤީންކަން ދީފައެވެ.
މީގެ އިތުރުން މިދުވަސްވަރު ރާއްޖެއަށް ވިއްސާރަ ނަމަވެސް، މަސްވެރިކަން ރާއްޖޭގެ އުތުރާއި ދެކުނުގައި އަދި މެދު ރާއްޖޭގައިވެސް ރަނގަޅު ކަމަށް މިފްކޯއިން ފާހަގަ ކުރެއެވެ. އެގޮތުން ދުވާލެއްގެ މައްޗަށް 450 ޓަނުގެ މަސް ކިރަމުންދާ ކަމަށް އެކުންފުނިން ބުނެއެވެ.