އައްޑޫ ސިޓީ ކައުންސިލުން ލޯންޗެއް ގަންނަނީ ކައުންސިލަށް އާމްދަނީ ހޯދަން ދަތުރުފަތުރުގެ ހިދުމަތް ދޭން ކަމަށް ކައުންސިލުން ބުނެފި އެވެ.
އަށާރަ މީހުންގެ ޖާގައިގެ ގަލްފް ކްރާފްޓް ލޯންޗެއް ކައުންސިލަށް ވިއްކަން ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު މި މަހުގެ 30 ވަނަ ދުވަހާ ހަމައަށް ކައުންސިލުން ވަނީ ހުޅުވާލައިފަ އެވެ.
މި ލޯންޗް ގަންނަނީ ސަރަޙައްދީ ތަރައްޤީގެ މަޝްރޫޢުގެ ދަށުން ދޫކުރެވިފައި ހުރި ކަޅުހަން ތާނގީތަކަށް ލިބިފައިވާ ފައިސާ ދެކުނުގެ ހަތަރު އަތޮޅުގެ މެދުގައި ހަމަހަމަ އުޞޫލުން ބެހުމަށް ފަހު، އައްޑޫ ސިޓީ ކައުންސިލަށް ކަނޑައެޅިފައި ހުރި 109،4896.34ރ. ގެ ތެރެއިންނެވެ.
ކައުންސިލަށް ލޯންޗެއް ގަތުމުގެ މައްސަލަ މިދިޔަ މަހުގެ 24 ވަނަ ދުވަހު އޮތް، ކައުންސިލްގެ އަށް ވަނަ ބައްދަލުވުމަށް ހުށަހެޅުއްވީ މޭޔަރު އަބްދުﷲ ސޯދިގް (ސޯބެ) އެވެ.
"އައްޑޫ ސިޓީ ކައުންސިލަށް އާމްދަނީ ހޯދޭނެ މަގުފަހި ކުރުމުގެ މަޤްޞަދުގައި މޭޔަރު ހުށަހަޅާފައިވާ މައްސަލަ އާ ގުޅިގެން ކައުންސިލް މަޖިލިސްގައި ނިންމި ގޮތަކީ، އައްޑޫ ސިޓީގެ ރައްޔިތުންނާއި، އައްޑޫ ސިޓީ ކައުންސިލްއިން ކަނޑުމަގުން ފުވައްމުލަކާއި އައްޑޫ ސިޓީގެ ހުޅުދޫ އަދި މީދޫ އަވަށަށް ގިނަ ދަތުރުތައް ކުރަން ޖެހި، ދަތުރު ކުރެވޭނެ އިންތިޒާމް ހަމަޖެހިފައި ނެތުމުގެ ސަބަބުން ކައުންސިލްއަށް ގިނަ ދަތިތަކާ ކުރިމަތިވަމުން ދިއުމާއި، ކައުންސިލުން ކުރާ މިފަދަ ދަތުރުތަކަށް ބޮޑު ހޭދައެއް ކުރަން ޖެހިފައިވާތީ، ކައުންސިލްގެ ދަތުރުފަތުރުގެ ޚަރަދު ކުޑަކުރުމާއި އައްޑޫ ސިޓީ ކައުންސިލް އަށް އާމްދަނީ އިތުރު ކުރުމުގެ މަޤްޞަދުގައި ކައުންސިލް އިދާރާ އަށް ފެންވަރު ރަނގަޅު ލާންޗެއް ގަތުމެވެ." ކައުންސިލްގެ ނިންމުމުގައިވެ އެވެ.
ލޯންޗް ތުމަށްފަހު ކައުންސިލުން އާމްދަނީ ހޯދުމަށްޓަކައި، ފުވައްމުލަކާއި އައްޑޫގެ އެކި ސަރަޙައްދުތަކަށް ކަނޑުމަގުން ކުރެވޭ ދަތުރުތަކަށް ފުރުޞަތު ހުޅުވާލުމާ އެކު، ކައުންސިލުން ކަނޑައަޅާ އުޞޫލުގެ ދަށުން ދަތުރުތަކަށް ފައިސާ ނެގޭނެ ގޮތެއް ހަމަޖެއްސުމަށް ވެސް އެ ބައްދަލުވުމުގައި ނިންމި އެވެ.