އަލަށް ކައިވެނިކޮށްގެން ނުވަތަ ކައިވެނިކޮށްގެން އުޅޭތާ އަހަރުތަކެއްވެފައިވާ ދެމަފިރިންގެ ދެމެދުގައި މައްސަލަތައް ޖެހެނީ ކީއްވެގެން ބާވަ އެވެ.
އުފާވެރި ދިރިއުޅުމަކާ ދިމާއަށް މިސްރާބު ޖެހުމުގެ ބަދަލުގައި، ދެ މީހުންގެ ގުޅުން ހީނަރުވެ، ކައިވެންޏަކީ އުފާވެރި ނޫސް، ނުތަނަވަސް ގުޅުމަކަށް ވާން މެދުވެރިވާ ސަބަބަކީ ކޮބައިތޯ އެވެ؟
ފަހުގެ ދިރާސާއަކުން ދައްކާ ގޮތުގައި މަހަކު ތިން ފަހަރު ޖިންސީ އުފާ ހޯދާ ދެމަފިރިންނަށް ވުރެ، މަހަކު 11 ފަހަރު އެ އުފާ ތަޖުރިބާ ކުރާ ދެމަފިރިންގެ ގުޅުން ވަރުގަދަވެ، އުފާވެރި ދިރިއުޅުމަކަށް ފުރުސަތު ފަހިކޮށްދެ އެވެ.
މި ދިރާސާގައި ހަރަކާތްތެރިވެވަޑައިގެންނެވި މަޝްހޫރު ލިއުންތެރިޔާ އަދި ސައިކޮތެރަޕިސްޓް އެމް. ގެރީ ނިއުމަން ވިދާޅުވި ގޮތުގައި ކައިވެންޏަށް ދެ ތިން އަހަރެއްގެ ތެރޭގައި މައްސަލަތައް ޖެހި ނުތަނަވަސްކަން މެދުވެރިވާ ނަމަ، އެކަމާ ސީރިއަސްކޮށް ވިސްނައި ގުޅުން ވަރުގަދަ ކުރަން މަސައްކަތްތަކެއް ކުރަން ޖެހެ އެވެ.
އޭނާ ވިދާޅުވީ ދެމަފިރިންގެ މެދުގައި ޖިންސީ އުފާ ކުޑަވުމަކީ ގުޅުމަށް ބުރޫއަރާ މައިގަނޑު އެއް ސަބަބެވެ.
މި ދިރާސާ ނިއުމަން ކޮށްފައި ވަނީ ކައިވެނި އުފާވެރި އަދި އުފާވެރި ނޫން ކަމަށް ބުނި 400 އަންހެނުން ބައިވެރިކޮށްގެންނެވެ.
ދިރާސާގައި މައިގަނޑު ގޮތެއްގައި ބެލީ އެ އަންހެނުން އާންމުކޮށް އެ މީހުންނާގެ ފިރިންނާ އެކު ޖިންސީ އުފާ ހޯދަން ބޭނުން ކުރާ ތާވަލާ ބެހޭ ގޮތުންނެވެ.
އޭގެ ތެރެއިން ގިނަ އަންހެނުން ބުނެފައި ވަނީ އެ މީހުން މަހެއްގެ މައްޗަށް 10 ފަހަރަށް ވުރެ ގިނައިން ފިރިމީހާ އެކު ޖިންސީ ގުޅުން ހިންގާ ކަމަށެވެ.
އޭގެ ސަބަބުން ދެ މީހުންގެ ގުޅުން ހަރުދަނާކޮށް، ވަރުގަދަކޮށް ދިނުމުގެ އިތުރުން ދެ މީހުންގެ މެދުގައި އޮންނަ ލޯބި އިތުރުވާ ކަމަށް އެފަދަ އަންހެނުން ބުންޏެވެ.
އެކަމަކު މަހަކު ގާތްގަނޑަކަށް ތިން ފަހަރު ޖިންސީ އުފާ ހޯދާ އަނބިން ބުނީ އެ މީހުންގެ ހަޔާތުގައި މާ ބޮޑު އުފާވެރި ކަމެއް ނެތް ކަމަށެވެ. އަދި އަބަދު ވެސް އުޅެން ޖެހެނީ ދިރިއުުމުގެ އެހެން ކަންކަމާ އެކު ނުތަނަވަސްކަމުގެ ތެރޭގައި ކަަމަށް އެފަދަ އަންހެނުން ބުންޏެވެ.
"އިމޯޝަނަލް އިންފެޑިލިޓީ: ހައު ޓް އެފެއާ ޕްރޫފް ޔޯ މެރިޖް އެންޑް 10 އަދާ ސީކްރެޓްސް ޓް އަ ގްރޭޓް ރިލޭޝަންޝިޕް" ގެ ލިއުންތެރިޔާ ނިއުމަން ވިދާޅުވީ ދެމަފަރިންގެ ދެމެދުގައި އޮންނަ ގުޅުން ވަރުގަދަ ކުރަން އެކުގައި ގިނަ ވަގުތު ހޭދަ ކުރަން ޖެހެ އެވެ.
މި ޒަމާނަކީ ގިނަ ބަޔަކު އިންޓަނެޓްގައި ތާށިވެ "ވާޗުއަލް" ދުނިޔެއެއްގައި އުޅޭ ޒަމާނަކަށްވާތީ، އެއީ ގުޅުމަށް ބުރޫ އަރާ ކަމަކަށްވެ އެވެ.
އެހެންވެ އެއްތަންވެ ގިނަ ވަގުތުތައް އެކުގައި ހޭދަކޮށް ދެމަފިރިން ގިނަގިނައިން "ގައިގޯޅިވުމަކީ" ކާމިޔާބު ކައިވެންޏަކާއިގެން އުމުރު ދުވަހު ކުރިއަށް ދެވޭނެ މަގެކެވެ.