އޭޑީއެފްޑީން ވެލާނާ އެއާޕޯޓު ނިންމަން ދޭން ބުނި ފައިސާ ހަމަޖެއްސީ މި ސަރުކާރުން ކުރެވުނު މަޝްވަރާތަކުގެ ތެރެއިން ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
ފިނޭންސް މިނިސްޓަރ މިހެން ވިދާޅުވެ ރާއްޖޭގެ ބައެއް މީޑިއާތަކަށް މައުލޫމާތު ދެއްވައި ވިދާޅުވީ، ވެލާނާ އެއާޕޯޓު ނުނިމި ހުރި މަސައްކަތް ނިންމަން ކުރިއާލާ މަޝްވަރާ ކުރެވި އެކަމަށް ސިޓީތައް ފޮނުވިފައިވާ ކަމަށެވެ. އެގޮތުން ވެލާނާ އެއާޕޯޓު މަސައްކަތް ކުރުމަށް ފައިނޭންސް ކުރާ އަރަބި ކޯޑިނޭޝަން ގްރޫޕުގެ ބައްދަލުވުންތަކެއް މިއަހަރު ތެރޭގައި އަދި އޭގެ ކުރީ އަހަރުގެ ފަހުކޮޅުވެސް ކުރިއަށް ގެންދިޔަ ކަމަށް ވިދާޅުވިއެވެ.
އެއާޕޯޓުގެ ޓާމިނަލް މަސައްކަތައް ހަތަރު ފަރާތަކުން ފަންޑު ކުރެއެވެ. އެއީ ސައުދީ ފަންޑު، އޯޕެކް ފަންޑު، ކުވޭއިތު ފަންޑު އަދި އަބުދާބީ ފަންޑުންނެވެ. މިމަސައްކަތައް ގެނައި ބަދަލާއެކު ބާކީ 200 މިލިއަން ޑޮލަރެވެ. މީގެ ތެރެއިން 100 މިލިއަން ޑޮލަރު ސައުދީ ސަރުކާރުން މިދިޔަ އޮކްޓޫބަރ މަހު ހަމަޖެހިފައިވާ ކަން ސަރުކާރުން ވަނީ ހާމަކޮށްފައެވެ.
އަދި މިހާރު އަބޫދާބީ ފަންޑުން ހަމަޖެހިފައިވާ 80 މިލިއަން ޑޮލަރަކީ އޭގެއިން ބާކީ އެއްބައި ކަމަށް މިނިސްޓަރ ވަނީ މީޑިއާތަކަށް މައުލޫމާތު ދެއްވަމުން ވިދާޅުވެފައެވެ. މިނިސްޓަރ އަމީރު ފާހަގަ ކުރެއްވި ގޮތުގައި، އަބޫދާބީ ފަންޑުން ހަމަޖެހިފައިވާ މި ފައިސާ އަކީ ޑރ. މުޢިއްޒުގެ ދަތުރުގެ މާކުރިންވެސް ހަމަޖެހިފައިވާ ފައިސާ ކަމަށާއި، އަދި އެ ފަރާތުން ހަމައެކަނި އެ މައުލޫމާތު އިންތިހާބީ ރައީސާއި ހިއްސާ ކުރީ ކަމަށް ވިދާޅުވިއެވެ.
ވެލާނާ އެއާޕޯޓު ތަރައްޤީ ކުރުމުގެ މަސައްކަތް އަންނަ އަހަރު ސެޕްޓެމްބަރަށް ނިންމަވާނެ ކަމަށް އިންތިހާބީ ރައީސް ޑރ. މުޢިއްޒު ވަނީ ވިދާޅުވެފައެވެ. މިއީ މަސައްކަތަކީ އަރަބި ކޯޑިނޭޝަން ގްރޫޕުގެ ހިމެނޭ ފަރާތްތަކުން 350 މިލިއަން ޑޮލަރު ޙަރަދުކޮށް ހިންގާ ބޮޑު މަޝްރޫޢު އެކެވެ. މިމަޝްރޫޢުގެ ތެރެއިން ވެލާނާ އެއާޕޯޓު ޓާމިނަލް އަހަރަކު 7.5 މިލިއަން ޕަސިންޖަރުންނަށް ޙިދުމަތް ދޭން ތަރައްޤީ ކުރެވޭނެއެވެ.