ޝާހްރުކް ހާން އިޝްތިހާރު ކުރާ ކުލައެއް ޕްރޮމޯޓް ކުރަން ނޭޕާލްގައި ބާއްވާ ޕްރޮމޯޝަނަލް އިވެންޓަކަށް ކަތަމަންޑު އަށް އިއްޔެ ގޮސްފި އެވެ.
ކަތަމަންޑު އަށް ދިއުމަށް ފަހު ޝާހް ވަނީ ޓްވީޓް ވެސްކޮށްފަ އެވެ.
ޓްވީޓްގައި އޭނާ ބުނީ ކަތަމަންޑު އަށް އާދެވުމުން ވަރަށް ހިތްހަމަޖެހިފައި ހުރި ކަމަށެވެ. އަދި މީގެ އަހަރުތަކެއް ކުރިން ވެސް ކަތަމަންޑު އަށް ދެވުނުކަން ޝާހްރުކް ފާހަގަ ކުރި އެވެ.
ޓްވީޓްގައި ޝާހްރުކް އިތުރަށް ބުނީ ބައެއް މީހުންނަށް މިއީ ހެއްވާ ވާހަކައަކަށް ވެދާނެ ކަމަށެވެ.
އެކަމަކު އޭނާގެ މައިންބަފައިން ގޮވައިގެން ނޭޕާލްގައި ބިރިޔާނީ ކާލަން ދާން ބޭނުންވާ ކަމަށް ދުނިޔޭގައި ދެވަނަ އަށް އެންމެ މުއްސަނދި އެކްޓަރު ބުންޏެވެ.
ތިން ކުދިންގެ ބައްޕަ ޝާހްރުކްގެ މަންމަ އާއި ބައްޕަ ވެސް ވަނީ މީގެ އަހަރުތަކެއް ކުރިން މަރުވެފަ އެވެ.
ޝާހްރުކްގެ ކުރިއަށް ހުރި ފިލްމުތަކުގެ ތެރޭގައި މަނީޝް ޝަރްމާގެ "ފޭން" އާއި ރާހުލް ދޮލާކިއާގެ "ރައީސް" ގެ އިތުރުން ރޯހިތު ޝެޓީގެ އަދި ވަކި ނަމެއް ހަމަނުޖެހޭ ފިލްމެއް ހިމެނެ އެވެ.
މީޑިއާ ރިޕޯޓްތައް ބުނާ ގޮތުން "ފޭން" ގެ ޝޫޓިން މިހާރު ގާތްގަނޑަކަށް ނިމުމަކާ ހަމައަށް އައިސްފައިވާ އިރު، މި މަހުގެ ފަހުކޮޅު "ރައީސް" ގެ ޝޫޓިން ފަށާނެ އެވެ.