މެންޓަލް ހެލްތަށް ހޭލުންތެރިކަން ކުރަން ހާއްސަ ސެޝަނެއް މިއަދު އައްޑޫގައި ބާއްވަން ތައްޔާރުވެއްޖެ އެވެ.
އައްޑޫގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީން އިންތިޒާމުކޮށްގެން "ސިޕް އެންޑް ޝެއާ ބްރޫވިން މެންޓަލް ހެލްތު" ގެ ނަމުގައި ބާއްވާ މި ސެޝަން އޮންނާނީ މިއަދު ހަވީރު ފޭދޫ ސްކޫލްގަ އެވެ. މި ސެޝަން އަންހެނުން ކޮމިޓީން ބާއްވަނީ ވިލާ ކޮލެޖްގެ އައްޑޫ ކޭމްޕަހާ ގުޅިގެންނެވެ.
ސެޝަން ހަވީރު 4:30 ގައި ފަށަން ތާވަލުކޮށްފައިވާ އިރު، ވީހާ ވެސް ގިނަ ބަޔަކު އޭގައި ބައިވެރިވާން އަންހެނުންގެ ކޮމިޓީން އެދިފައިވެ އެވެ.
މެންޓަލް ހެލްތު ނުވަތަ ނަފުސާނީ ދުޅަހެޔޮކަމާ ގުޅޭ މައްސަލަތަކަކީ ފަހަކަށް އައިސް ދިވެހިންގެ ތެރޭގައި ވަރަށް އާންމު ބޮޑު މައްސަލައެކެވެ. ނަމަވެސް މެންޓަލް ހެލްތާ ބެހޭ ގޮތުން ވާހަކަ ދައްކައި، އެފަދަ މައްސަލަތަކުން އަރައިގަތުމަށްޓަކައި މަސައްކަތްކޮށް، ފަރުވާ ހޯދުން ފަދަ ކަންކަމަކީ ދިވެހިންގެ ތެރޭގައި އެހާ އާންމު ކަމެއް ނޫނެވެ.
އެހެންވެ މިހާރަކަށް އައިސް މެންޓަލް ހެލްތާ ބެހޭ ގޮތުން ވާހަކަ ދެކެވި، މަޝްވަރާކޮށް، ބަހުސް ކުރެވި ހޭލުންތެރިކަން އުފައްދަން އެކި ފެންވަރުގައި އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން މެންޓަލް ހެލްތަށް ފަރުވާ ހޯދޭނެ ފުރުސަތުތައް ވެސް ސަރުކާރުން އަންނަނީ ފަހިކޮށް ދެމުންނެވެ.
މެންޓަލް ހެލްތުގެ އެންމެ އާންމު ކަންކަމުގެ ތެރޭގައި ޑިޕްރެޝަނާއި އެންޒައިޓީ ހިމެނެ އެވެ.