އިންޓަ-ޕާލިމެންޓަރީ ޔޫނިއަން (އައިޕީޔޫ) ގެ ކޮމިޓީ އޮން ޑިމޮކްރެސީ އެންޑް ހިއުމަން ރައިޓްސްގެ ޗެއާގެ މަގާމަށް ހިންނަވަރު ދާއިރާގެ ރައްޔިތުންގެ މަޖިލީހުގެ މެންބަރު ޖީހާން މަހްމޫދު އައްޔަންކޮށްފި އެވެ.
އެ ކޮމެޓީގެ ޗެއާގެ މަގާމުގެ މުއްދަތު ހަމަވާނީ 2025 ގެ ނިޔަލަށެވެ. ޖީހާނަކީ ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމެޓީގެ ޗެއާ ވެސް މެ އެވެ. އައިޕީޔޫގެ އިސް މަގާމެއް ޖީހާނަށް ލިބިވަޑައިގަތުމާ ގުޅިގެން އެކަން މިއަދު މަޖިލީހުގެ އިދާރާ އިން ވެސް ފާހަގަކޮށް މަރުހަބާ ވިދާޅުވެފައިވެ އެވެ. އަދި އައްޑޫ މީދޫ ދާއިރާގެ މެންބަރު ރޮޒައިނާ (ރޮޒޭ) ވެސް ޖީހާނަށް މަރުހަބާ ވެސް ވިދާޅުވެފައިވެ އެވެ.
ސިޔާސީ ދާއިރާ އަށް ނުކުންނެވުމުގެ ކުރިން ޖީހާނީ ރާއްޖޭގެ ހިއުމަން ރައިޓްސް ކޮމިޝަން (އެޗްއާރްސީއެމް) ގެ މެންބަރު ވެސް ކުރައްވާފައިވާ ބޭފުޅެކެވެ.
ޖީހާނަކީ މިހާރު 87 މެންބަރުން ތިއްބެވި މަޖިލީހުގައި ތަމްސީލުކުރައްވާ ހަތަރު އަންހެން މެބަރުންގެ ތެރެއިން އެއް މެންބަރެވެ.