މިވަގުތު އިޒްރޭލުން ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ އަނިޔާވެރި ހަމަލާތައް ކުށްވެރިކޮށް ފަލަސްތީނުގެ ރައްޔިތުންނާއި އެކު ތިބިކަން ހާމަކޮށް އައްޑޫސިޓީ ކައުންސިލުން ކެމްޕެއިނެއް ފަށައިފިއެވެ.
މި ކެމްޕެއިނުގެ ތެރެއިން އައްޑޫސިޓީ ކައުންސިލް އިދާރާގެ އިމާރާތުގައި ވަނީ ބޮޑު ދިދައެއް ހަރުކޮށްފައެވެ. އަދި މިދިޔަ ހަފްތާއިން ފެށިގެން ކައުންސިލް އިދާރާގެ ޖަލްސާތައް ފޭސްބުކް ލައިވް ސްޓްރީމުގައި ފަލަސްތީނު ޝިޢާރު ބޭނުން ކުރުމަށް ވަނީ ފަށާފައި ކަމަށް އައްޑޫސިޓީ ކައުންސިލުން މައުލޫމާތު ދެއެވެ. މީގެ އިތުރަށްވެސް ކައުންސިލުން ކުރެވެން ހުރި ބައެއް ކަންކަން ކުރަމުންދާނެ ކަމަށް ކައުންސިލް އިދާރާއިން ބުނެއެވެ.
އައްޑޫސިޓީ ކައުންސިލް އިދާރާއިން ފަލަސްތީނުގެ ރައްޔިތުންނާއި އެކުގައި ތިބިކަން ހާމަކޮށް ކެމްޕެއިނެއް ފަށާފައިވާއިރު، އައްޑޫގެ އެކި ޖަމީއްޔާ ޖަމާޢަތްތަކުގެ އިންތިޒާމު ކުރާ އެކި ހަރަކާތްތަކުގަވެސް ދަނީ އެހީ ތެރިކަން ފޯރުކޮށްދެމުންނެވެ. މީގެ ތެރެއިން ހިތަދޫގައި ޖަމީއްޔާތަކާއި ގުޅިގެން އެއްވުންތައް ބާއްވާފައިވާއިރު، މަރަދޫ އަދި ހުޅުދޫ މީދޫގައިވެސް އަވަށު އޮފީހާއި ގުޅިގެން ހިނގާލުންތައް ވަނީ ކުރިއަށް ގެންގޮސްފައެވެ. ފޭދޫ އަވަށު އޮފީހުންވެސް ވެހިކަލް ބުރެއް ބާއްވާފައިވާއިރު ފަންޑް ރެއިޒިން ހަރަކާތްތަކެއް ވަނީ އިންތިޒާމުކޮށްފައެވެ.
އައްޑޫގެ އަވަށު އޮފީސްތަކުން މިހާތަނަށް އެއްކުރި ފައިސާއަށް ބަލާއިރު، ފޭދޫ އަވަށު އޮފީހުން ބައިލައްކަ ރުފިޔާ ދިވެހި ރެޑް ކްރެސެންޓުގެ ފަލަސްތީން ފަންޑަށް ވަނީ ހަދިޔާކޮށްފައެވެ. މީގެ އިތުރުން މީދޫ އަވަށު އޮފީހުން ވަނީ އެ ރަށުގެ ޖަމީއްޔާތައް ގުޅިގެން ހިންގި ފަންޑް ރެއިޒިން ހަރަކާތްތަކުން އެއްކުރި 80،000ރ. އަށް ވުރެ ގިނަ ރުފިޔާ އިންޓަނޭޝަނަލް އެއިޑް ކެމްޕެއިންގެ ފަންޑަށް ހަދިޔާކޮށްފައެވެ.