މޯލްޑިވްސް އެއާޕޯޓްސް ކޮމްޕެނީ ޕްރައިވެޓް ލިމިޓެޑްގެ ގްރައުންޑް ހޭންޑްލިންގް އަށް ބޭނުންވާ ގިނަ އިކުޕްމެންޓްތަކެއް ގެނެސް ބޭނުން ކުރަން ފަށައިފިއެވެ.
އެމްއޭސީއެލްއިން އަލަށް ގެނައި ގްރައުންޑް ހޭންޑްލިންގް އިކިއުޕްމެންޓުތަކަކީ އެއާޕޯޓުން އެއާލައިންތަކަށް ޚިދުމަތް ދިނުމުގައި މިހާރު ދިމާވާ ދަތިތަކަށް ހައްލެއް ގެނެސް ޚިދުމަތް އަވަސް ކުރުމުގެ މަޤްޞަދުގައި ގެނެސްފައިވާ އިކުޕްމެންޓުތަކެކެވެ. މި އިކުޕްމެންޓުތައް ބޭނުން ކުރަން ފެށުމަށް ބުދަ ދުވަހު ބޭއްވި ރަސްމީއްޔާތުގައި އެކުންފުނީގެ މެނޭޖިންގް ޑިރެކްޓަރ މަހުޖޫބް ޝުޖާޢު އަދި އެމްއޭސީއެލްގެ އިސްވެރިން ބައިވެރިވެވަޑައިގެންނެވިއެވެ.
އެމްއޭސީއެލް އިން ވެލާނާ އެއާޕޯޓަށް އަލަށް ގެނައި ގްރައުންޑް ހޭންޑްލިން އިކުޕްމެންޓުތަކަކީ؛
- 4 ބަސް
- 4 އެއާކްރާފްޓް ސްޓެއަރ
- 2 ޔުނިވާސަލް ލޯޑަރ
- 2 ހައިލޯޑަރ
- 10 ބެގޭޖް ޓްރެކްޓަރ
- 1 މިނީވޭން – 14 ސީޓުގެ
- 1 ބަސް – 32 ސީޓުގެ
- 1 އެއާކޮންޑިޝަން
- 30 ކޯން އެންޑް ޗޮކް ޓްރޯލީ
- 1 ކޮންޓެއިނަރ އެންޑް ޕެލެޓް ޓްރާންސްޕޯޓަރ
- 4 ކޮންވެޔަރ ބެލްޓް
- 3 ގްރައުންޑް ޕަވާ ޔުނިޓް
- 40 ކޮންޓެއިނަރ އަދި ޕެލެޓް ޑޯލީ
- 1 ޓޮއިލެޓް ޓްރަކް
- 1 ޓްވިން ކެބް
މި އިކުޕްމެންޓުތަކާއި އެކު އެއާލައިންތަކަށް އެކުންފުނިން ދެމުންދާ ޚިދުމަތް ހަލުވި ވެގެން ދާނެ ކަމަށް އެމްއޭސީއެލްއިން ޤަބޫލު ކުރެއެވެ. އަދި މީގެ އިތުރުންވެސް އިތުރު ގްރައުންޑް ހޭންޑްލިންގް އިކުޕްމެންޓުތައް ގެނައުމަށް މަސައްކަތް ކުރަމުންދާ ކަމަށް އެކުންފުނިން ހާމަކުރެއެވެ.
އެމްއޭސީއެލްގެ އޮޕަރޭޝަންސްތައް ފުޅާ ކުރަމުންދާއިރު، އެއާޕޯޓުގެ އައު ޓާމިނަލް މަސައްކަތް އަންނަ އަހަރަށް ނިންމާނެ ކަމަށް އިންތިހާބީ ރައީސް ވަނީ ވިދާޅުވެފައެވެ. އައު ޓާމިނަލާއެކު އެމްއޭސީއެލްގެ ގްރައުންޑް އޮޕަރޭޝަން ވަރަށް ބޮޑަށް ފުޅާވެގެން ދާނެ ކަމަށް ބެލެވެއެވެ.