އިންފްރާސްޓްރަކްޗާ ހުރި ގޮތުން މާފުށީ ޖަލުގައި ހުކުމް ތަންފީޒުކުރާ ގައިދީން ވަކިކުވެރެން ނެތް ކަމަށާއި އެގެ ސަބަބުން ކުދި ކުށްތަކުގައި ޖަލަށްލާ މީހުންގެ ހާލަތު އިތުރަށް ގޯސްވާން މަގުފަހިވާ ކަމަށް ކޮމިޝަނަ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެ އެވެ.
މާފުށީ ޖަލުގެ 25 ވަނަ އަހަރީ ދުވަސް ފާހަގަކުރަށް ރޭ ބޭއްވި ރަސްމިއްޔާތުގައި އޭނަ ވިދާޅުވީ ތަފާސް ހިސާބުތަކަށް ބަލާ އިރު، ޖަލުގެ އާބާދީގެ ތެރޭގައި ފުރަތަމަ ފަހަރަށް ކުށެއް ކޮށްގެން އެއް އަހަރަށް ވުރެ ކުޑަ މުއްދަތަކަށް ޖަލަށް ގެންދެވޭ މީހުންގެ ޕަސެންޓޭޖަކީ ގާތްގަނޑަކަށް 20 ޕަސެންޓް ކަމަށެވެ. ނަމަވެސް ކަމަށާއި ޖަލުގެ އިންފްރާސްޓްރަކްޗާ ހުންނަ ގޮތުން އެ މީހުން ސީރިއަސް ކުށް ކޮށްފައިވާ މީހުންނާ ވަކިން ގެންގުޅެވެން ނެތުމުގެ ސަބަބުން، ސީރިއަސް ކުށްކުރާ މީހުންގެ ފިލޯސަޕީ ފެތުރުމުން އޭގެ ނަތީޖާއެއްގެ ގޮތުން ޖަލުން ނިކުތުމަށް ފަހު އޭގެ ތެރެއިން ގިނަ އަދަދެއްގެ މީހުން އަނބުރާ ކުށުގެ ވެއްޓަށްދާ ކަމަށް އަހުމަދު ވިދޅުވި އެވެ.
އެހެންވެ ކުދި ކުށްތައް ކުރާ މީހުންނަށް ޖަލު ނޫން އަދަބެއް ތަޢާރަފުކުރެވިގެން ނޫނީ އެފަދަ މައްސަލަތަކަށް ހައްލެއް ނުލިބޭނެ ކަމަށް ވިދާޅުވި އެެވެ. މި ސަބަބާ ހުރެ އަންނަ އަހަރުގެ ބަޖެޓްގައި އިލެކްޓްރޯނިކް ޓެގް ހިމަނާފައިވާ ކަމަށާއި އެ ބޭނުންކޮށްގެން ގޭގައި ނުވަތަ ވަކި ތަނެއްގައި ކުށްވެރިން ބައިތިއްބައިގެން މޮނިޓަ ކުރެވޭނެ ކަމަށް ކޮމިޝަނަރު ވިދާޅުވި އެވެ.
އަހުމަދު ވިދާޅުވީ މިހާރު މަސައްކަތްތައް ހުންނަ ގޮތުން އިންސާނީ ވަޞީލަތްތައް އެންމެ ބޮޑަށް ބޭނުންކުރަން ޖެހެނީ ޤައިދީން އެއް ތަނުން އަނެއް ތަނަށް އުފުލައި އެ މީހުން ބެލެހެއްޓުމަށެވެ.
ނަމަވެސް ޖަލު ނޫން ޙުކުމެއް ތަންފީޒު ކުރަން ފެށުމުން، ޖަލަށް ގެނެވޭ އާބާދީ މަދުކުރެވޭނެ ކަމަށާއި އޭރުން ޖަލުގައި ތިބޭނީ ސީރިއަސް ކުށްކުރާ މީހުން އެކަނި ކަމަށް ކޮމިޝަނަރު ވިދާޅުވި އެވެ. އަދި ޖަލުގެ އާބާދީ މަދުކުރެވުމުން ޤައިދީން ރިހެބިލިޓޭޓްކުރުމަށް ކުރާ މަސައްކަތްތަކަށް އިތުރަށް ހިއުމަން ރިސޯސްގެ ބޭނުން ހިފޭނެ ކަމަށް ވިދާޅުވި އެވެ.
އަހުމަދު ވިދާޅުވީ އަންނަ އަހަރު ޖަލު ނޫން އަދަބު ތަންފީޒުކުރުމުގެ ނިޒާމު އިތުރަށް ހަރުދަނާ ކުރެވިގެން ދާނެ ކަމަށެވެ.