އިންތިހާބީ ރައީސް ޑރ. މުހައްމަދު މުއިއްޒުގެ ކެބިނެޓްގައި ހިމެނޭނެ ކަމަށް ބުނާ ބޭފުޅުންގެ ވާހަކަތައް މިހާރު ދެކެވެމުން އަންނަ އިރު، ހޯމް މިނިސްޓަރަކަށް ވާނީ އެމްއެންޑީއެފްގެ ކުރީގެ ކެޕްޓަން އަލީ އިހުސާން ކަމަށް ބައެެއް މީޑިއާތަކުން ބުނެފި އެވެ.
އިހުސާން 2022 ގެ ޖޫން މަހުގެ ތެރޭގައި ސިފައިންގެއިން ވަކިވެވަޑައިގަތް ފަހުން އުޅުއްވަނީ އާއިލީ ވިޔަފާރި ހިންގުމުގެ މަސައްކަތުގަ އެވެ. އެގޮތުން އޭނަ އަކީ ރާއްޖޭގެ މަޝްހޫރު ކުންފުނި، ހެޕީ މާކެޓްގެ މެނޭޖިން ޑިރެކްޓަރެވެ. އެ ކުންފުނީގެ ވެރިއަކީ އިހުސާންގެ އަނބިކަނބަލުންގެ ބައްޕަ މުހައްމަދު ނައީމް (ހެޕީ މާކެޓް ނައީމު) އެވެ.
އައްޑޫ ފޭދު އަށް އުފަން އިހުސާނަކީ ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު އިބްރާހީމްދީދީ (އައިބީ) ދަރިކަލެކެވެ.
އާ ސަރުކާރުގެ މިނިސްޓަރެއްގެ މަގާމަށް އިހުސާން ވަޑައިގަންނަވާ އިރު، އައިބީ މިހާރު ގެންދަވަނީ އަންނަ އަހަރު ބާއްވާ ރައްޔިތުންގެ މަޖިލީހުގައި ވެސް ވާދަކުރައްވަން ކެމްޕޭން ކުރައްވަމުންނެވެ. ޕީޕީއެމް/ޕީއެންސީގެ ފަރާތުން އޭނަ ވާދަކުރައްވަން ނިންމަވާފައި ވަނީ ފޭދޫ ދެކުނު ދާއިރާއަށެވެ.
މި މަހުގެ 17 ގައި ރައީސްކަމުގެ ހުވާކުރައްވާ ޑރ. މުއިއްޒުގައިު ކެބިނެޓްގައި މުޅިން ވެސް ހިމެނޭނީ ތައުލީމީ، ގާބިލު ބޭފުޅުން ކަމަށް އެ މަނިކުފާނު ވިދާޅުވެފައިވެ އެވެ.