"ގެދޮރުވެރިޔާ" ސްކީމުގެ ދަށުން ފުރަތަމަ ބުރުގައި ދޫކުރާ ފްލެޓްތަކުގެ ދާއިމީ ލިސްޓަށް 7،400 އަށް ވުރެ ގިނަ ޝަކުވާ ހުށަހަޅައިފައިވާ ކަމަށް ހައުސިން މިނިސްޓްރީން ބުނެފިއެ ވެ.
ލިސްޓަށް ޝަކުވާ ހުށަހަޅަން ދިން ސުންގަޑީ ހަމަވީ ރޭ 12:00 އަށެވެ. ހައުސިން މިނިސްޓްރީން ބުނީ އެ ސުންގަޑި ހަމަވި އިރު، ލިސްޓަށް ޖުމްލަ 7،421 ޝަކުވާ ލިބިފައިވާ ކަމަށެވެ.
"ގެދޮރުވެރިޔާ" ސްކީމުގެ ދަށުން ފުރަތަމަ ބުރު،ައި 4،000 ފްލެޓް ދޫކުރަން ހަމަޖެހިފައިވެ އެވެ.
ނަމަވެސް ފްލެޓް ލިބޭ މީހުންގެ ލިސްޓް އާންމުކުރުމާ އެކީ ގިނަ ޝަކުވާތަކާއި ބޮޑެތި ކަންބޮޑުންތަކެއް، އެ މައްސަލާގައި ބައެއް މީހުން މިނިސްޓްރީ އަށް ވެސް މިދިޔަ ހަފުތާގެ ތެރޭގައި ޖަމާވި އެވެ. މިކަމާ ގުޅިގެން ފްލެޓް ހަވާލުކުރުން މަޑުޖައްސައިލަން އެންޓި-ކޮރަޕްޝަން ކޮމިޝަން (އޭސީސީ) އަންގައި މިކަމާ ގުޅޭ ތަހުގީގެއް ވެސް ފަށާފައިވެ އެވެ.
މި މަހުގެ 17 ގައި ވެރިކަމުގެ ހުވާކުައްވާ ޑރ. މުހައްމަދު މުއިއްޒުގެ ފަރާތުން ވެސް އޮތީ އެކަން މަޑުޖައްސައިލަން ސަރުކާރުގައި އެދިފަ އެވެ. އަދި މި ފްލެޓްތައް ދިނުން ހުއްޓުވަން އޭސީސީ އަށް ބަޔަކު ޕެޓިޝަނެއް ވެސް ހުށަހަޅާފައިވެ އެވެ.
ނަމަވެސް މިނިސްޓްރީން ބުނެފައި ވަނީ ފްލެޓް ދޫކުރުމުގައި އެއްވެސް އިހުމާލެއް، ގޯހެއް ހަދާފައި ނޯންނާނެ ކަމަށާއި ފްލެޓްތައް ހަވާލުކުރުން ނުހުއްޓުވޭނެ ކަމަށެވެ. ހައުސިން މިނިސްޓްރީން ބުނީ ފުރަތަމަ ބުރުގައި ދޫކުރާ 4،000 ފްލެޓަކީ ތިން ކޮޓަރީގެ އެޕާޓްމަންޓްތަކަށް ޝަރުތު ހަމަވާ މީހުންގެ ތެރެއިން 76 އިން ފެށިގެން މަތިން މާކްސް ލިބުނު މީހުންނާއި ދެ ކޮޓަރީގެ އެޕާޓްމަންޓްތަކަށް ޝަރުތު ހަމަވާ މީހުންގެ ތެރެއިން 73 އިން ފެށިގެން މަތިން މާކްސް ލިބުނު މީހުންނަށް ދޭން ނިންމާފައިވާ ފްލެޓްތައް ކަމަށެވެ.