ގަވާއިދާ ހިލާފަށް ރާއްޖޭގެ ސަރަހައްދަށް ވަދެ، މަސްވެރިކަން ކުރަނިކޮށް އަތުލައިގަތް އިންޑިއާގެ މަސްވެރިން ދޫކޮށްލައި، އެ މީހުން އިއްޔެ ގައުމަށް ފުރުވާލައިފި އެވެ.
ޓަމިން ނާޑޫ އަށް ނިސްބަތްވާ މި މަސްވެރިންގެ ތެރޭގައި ހިމެނެނީ 12 މީހުންނެވެ. ގަވާއިދާ ޚިލާފަށް މަސްވެރިކަން ކުރަނިކޮށް އެމްއެންޑީއެފުން އެ މީހުން އަތުލައިގަތީ މިދިޔަ މަހުގެ 23 ގަ އެވެ.
އެ މައްސަލައިގައި އުޅަނދު ޖޫރިމަނާކޮށް ރާއްޖޭގެ ކަމާބެހޭ ފަރާތްތަކުން އަންގާފައި ވަނީ ނޯޓިސް ލިބުނުތާ 30 ދުވަހުގެ ތެރޭގައި ޖޫރިމަނާގެ ފައިސާ ދެއްކުމަށެވެ. އަދި ޖޫރިމަނާ ނުދައްކާ ނަމަ ދިވެހި ފުލުހުން އެ މަސްވެރިން ހިފަހައްޓާނެ ކަމަށް ބުނެފައިވެ އެވެ.
އިންޑިއާގެ މަސްވެރިން ދޫކޮށްލައި އެ މީހުން އަނބުރާ އިއްޔެ ގައުމަށް ފޮނުވާ އިރު މީގެ ފަސް ވަރަކަށް ދުވަސް ކުރިން މަސްވެރިން ދޫކޮށްލުމަށް ޓަމިލް ނާޑޫގެ ސްޓޭޓް މިނިސްޓަރެއް ކަމަށްވާ އެމްކޭ ސްޓާލިން ގޮވާލާފައިވެ އެވެ.