ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމުގެ މައްސަލަ ކުރިއަށް ނުގެންދެވި މިއަދުގެ ޖަލްސާތައް ވެސް ނިންމައިލަން ޖެހިފައި ވަނިކޮށް ދެން އޮންނަ ޖަލްސާއަކަށް ދަޢުލަތުގެ ބަޖެޓުގެ މަސައްކަތް އެޖެންޑާ ކުރުމަށް ރައްޔިތުންގެ ނަޝީދު އެދިވަޑައިގެންފި އެވެ.
މަޖިލީހުގެ އަަމީންޢާންމު ފާތިމަތު ނިއުޝާއަށް ފޮނުއްވި ސިޓީއެގައި ރައީސް ނަޝީދު ވިދާޅުވެފައި ވަނީ، ދައުލަތުގެ ބަޖެޓު ޤާނޫނު އަސާސީގެ 96 ވަނަ މާއްދާގެ (ހ) އާއި މާލިއްޔަތު ޤާނޫނުގެ 32 ވަނަ މާއްދާގެ (ހ) ގެ ދަށުން، ލަސްވެގެން މާލީ އަހަރު ފެށުމުގެ ދެ މަސް ދުވަސްކު ރިން ހުށަހަޅަން ޖެހޭ ކަމަށެވެ. އެހެންކަމުން ބަޖެޓު ހުށަހެޅުމުގެ ފަހު ތާރީހަކީ މިދިޔަ މަހުގެ 31 ވަނަ ދުވަސްކަން ވެސް ފާހަގަކުރައްވާފައިވެ އެވެ.
އެކަމަކު އެ ދުވަހު އޮތް މަޖިލީހުގެ ޖަލްސާއަށް ބަޖެޓު ހުށަހެޅުން އެޖެންޑާކޮށް އެކަން އެންގި ނަމަވެސް ފިނޭންސް މިނިސްޓަރު އިބްރާހީމް އަމީރު މަޖިލީހަށް ހާޒިރުވެވަޑައި ނުގަތުމުގެ ސަބަބުން ޤާނޫނުން ލާޒިމުކުރާ ގޮތަށް އެ މުއްދަތުގައި ބަޖެޓު ހުށަހެޅިފައި ނުވާ ކަމަށް ނަޝީދު ވިދާޅުވި އެވެ. އެހެންވެ ދައުލަތާއި ރައްޔިތުންގެ ބޮޑު މަސްލަހަތެއް އެކުލެވިގެންވާ ކަމެއް ނުކުރެވި ލަސްވެފައިވާ ކަމަށް ވިދާޅުވި އެވެ.
މި ސަބަބާ ހުރެ އެ މައްސަލަ ލަސްކުރެވެން ނޯންނާނެ ކަމަށާއި ދެން އެންމެ އަވަހަށް ބާއްވާ ޖަލްސާގެ ފުރަތަމަ ކަމެއްގެ ގޮތުގައި ބަޖެޓްގެ މައްސަލަ އެޖެންޑާކުރުމަށް އެދިވަޑައިގެންފައިވެ އެވެ.
ނަމަވެސް އެމްޑީޕީން ބުނަމުން އަންނަނީ ނަޝީދު މަގާމުން ވަކިކުރަން ހުށަހަޅާފައި އޮތް މައްސަލައިގައި ގޮތެއް ނުނިމެނީސް މަޖިލީހުގެ އެހެން މަސައްކަތްތަކެއް ކުރިއަށް ނުގެންދެވޭނެ ކަމަށެވެ. މިއަދު ބޭއްވި ޖަލްސާ އަކީ، ނަޝީދު ވަކިކުރުމުގެ މައްސަލައިގައި، މަޖިލީހުގެ ނައިބު ރައީސާ ނުލައި ވެސް ޖަލްސާތައް ކުރިއަށް ގެންދެވޭނެ ކަމަށް މިދިޔަ ހަފުތާގައި ސުޕްރީމް ކޯޓުން ހުކުމްކުރި ފަހުން ބޭއްވި ފުރަތަމަ ޖަލްސާ އެވެ.
އެކަމަކު އެ މައްސަލަ މިއަދު ވެސް ކުރިއަށް ގެންދެވޭ ގޮތެއް ނުވި އެވެ. އެހެންވެ އެމްޑީޕީން މިހާރު ނިންމާފައީ ވަނީ މިކަމުގައި އެޓާނީ ޖެނެރެލްގެ ލަފައެއް ހޯދުމަށެވެ.