ވެލާނާ އެއާޕޯޓުގެ އައު ޓާމިނަލްގެ މަސައްކަތް 8 މަސް ދުވަސް އަވަސް ކުރަން ބޭނުންވާ ކަމަށް އިންތިހާބީ ރައީސް، ޑރ. މުހައްމަދު މުއިއްޒު ވިދާޅުވެއްޖެއެވެ.
އިންތިހާބީ ރައީސް، ޑރ. މުހައްމަދު މުޢިއްޒު އަދި އިންތިހާބީ ނައިބް ރައީސް، ހުސެއިން މުޙައްމަދު ލަތީފް، ވަނީ މިއަދު ވެލާނާ އެއާޕޯޓުގެ ޓާމިނަލް މަސައްކަތް ބައްލަވާލައްވާފައެވެ. މިމަސައްކަތް ބައްލަވާލައްވައި ނޫސްވެރިންނަށް މަޢުލޫމާތު ދެއްވަމުން ރައީސް، ޑރ. މުހައްމަދު މުޢިއްޒު ވިދާޅުވީ މި މަސައްކަތަކީ ޕްރޮޖެކްޓުގެ އަސްލު ސްކޯޕުގައި ކުރިއަށް ދިޔަ ނަމަ މިއަހަރު ނިންމާ ބޭނުން ކުރަން ފެށޭނެ ތަނެއް ކަމަށެވެ.
ނަމަވެސް މި ޕްރޮޖެކްޓަށް ބަދަލުތަކެއް ގެނެސް ވަރަށް ބޮޑަށް ލަސްވެފައިވާ ކަމަށާއި، ރައްޔިތުން މިއޮތީ އެކަަމަށް މި ސަރުކާރަށް ޖަވާބުދީފައި ކަމަށް ވިދާޅުވިއެވެ. އެމަނިކުފާނުގެ ވިދާޅުވީ، މި މަސައްކަތުގެ ސްކޯޕު ތެރޭގައި ބޮޑެތި މަސައްކަތް ނުހިމެނިވާކަން ފާހަގަ ކުރެވޭ ކަމަަށެވެ. އެގޮތުން މިހާރު ހުރި ސްކޯޕުގައި ޕްރޮޖެކްޓު ނިންމަން މިހާރު އޮތް ޓައިމް ލައިނަކީ 2025 ވަނަ އަހަރުގެ ޖޫން މަސް ކަމަށްވާއިރު، މިއަށް ވުރެ އަވަހަށް މަސައްކަތް ނިންމަން ޖެހޭ ކަމަށް ވިދާޅުވިއެވެ.
"އަޅުގަނޑު ބޭނުންވަނީ މި މަޝްރޫޢު މަދުވެގެން 8 މަސް އަވަސް ކުރަން. މަދުވެގެން 8 މަސް އެއީ، ޗެލެންޖެއް ވިއަސް ނުކުރެވޭނެ ކަމެއް ނޫން. ފައިސާގެ ގޮތުން އިންޖިނިއަރިން ގޮތުން، ޕްރޮޖެކްޓް މެނޭޖްމެންޓް ގޮތުން ހުރިހާ ގޮތަކުން އެކަން ކުރެވޭނެ. ކުރެވޭނެ ކަމުގެ ޔަޤީންކަން އެބައޮތް " މުޢިއްޒު ވިދާޅުވިއެވެ.
އިންތިހާބީ ރައީސް ވިދާޅުވީ، މިހާރު ހުރި މަސައްކަތް ނިމޭއިރުވެސް ޓާމިނަލް ބޭނުން ނުކުރެވޭނެ ކަމަށެވެ. އެގޮތުން ޓާމިނަލުގެ ޕްރޮޖެކްޓް ސްކޯޕުގެ ތެރޭގައި ސާވިސް ރޯޑު، ޓާމިނަލް އެތެރޭގެ ޑިއުޓީ ފްރީގެ އޮޕަރޭޝަން މަސައްކަތް، އެރައިވަލް އޭރިއާގެ ބޫތު އޭރިއާގެ މަސައްކަތް، އަދި އެތަން ކުރިމަތިން ޕާކިން މަސައްކަތް ވެސް ކުރަން ހަވާލު ކުރަން ޖެހޭ ކަމަށް ވިދާޅުވިއެވެ.
މި ހުރިހާ މަސައްކަތެއް ކުރުމާއެކު މި މަސައްކަތް "ފާސް ޓްރެކް" ކޮށް އަވަސް ކުރުމަކީ އަމާޒެއް ކަމަށާއި މިހާރު އުއްމީދަކީ އަންނަ އަހަރު އޮކްޓޯބަރހާ ތަނަށް މި ތަނުގެ ބޭނުން ހިފޭވަރުވުން ކަމަށް ވިދާޅުވިއެވެ.
ވެލާނާ އެއާޕޯޓުގެ ޓާމިނަލް މަސައްކަތަކީ ރާއްޖޭގެ އިޤްތިޞާދު ކޮޅަށް ނަގުމަށް ވަރަށް މުހިންމު މަސައްކަތެއް ގޮތުގައި ޑރ. މުޢިއްޒު ފާހަގަ ކުރެއްވިއެވެ.