ކާމިޔާބު ފިލްމްތަކެއް ޑައިރެކްޓްކޮށް، ޕްރޮޑިއުސްކޮށްފައިވާ ވިންދޫ ވިނޯދް ޗޯޕްޅާގެ ފުރަތަމަ ހޮލީވުޑް ފިލްމް "ބްރޯކެން ހޯސެސް" ގެ ޓްރެއިލާ ލޯންޗްކޮށްފި އެވެ.
ޓްރެއިލާ ލޯންޗްކޮށް ދިނީ މްބާއީގައި އޮތް ހަފުލާއެއްގައި ވިންދޫ ޑައިރެކްޓް ކުރި "އެކްލަވިއާ" ގެ މުހިއްމު ރޯލެއް އަދާ ކުރި އަމީތާބް ބައްޗަން އާއި އޭނާ ޕްރޮޑިއުސް ކުރި ދެ ބްލޮކްބަސްޓާ ކަމަށްވާ "ޕީކޭ" އާއި "3 އިޑިއަޓްސް" ގެ އެކްޓަރު އާމިރް ހާނެވެ.
"ބްރޯކެން ހޯސެސް"އަކީ ވިންދޫ ލިޔެ، ޑައިރެކްޓްކޮށް އަދި ޕްރޮޑިއުސް ވެސް ކޮށްފައިވާ ފިލްމެކެވެ. މި ފިލްމުގައި ހަރަކާތްތެރިވެފައި ވަނީ ހޮލީވުޑްގެ ތަރިންނެވެ.
އޭގެ ތެރޭގައި ވިންސެންޓް ޑީ އޮނޮފްރިއޯ، އޭންޓަން ޔެލްޗިން، މާރިއާ ވަލްވާޑް އަދި ތޯމަސް ޖޭން ހިމެނެ އެވެ.
އަންނަ މަހުގެ 10 ގައި ރިލީޒް ކުރަން ހަމަޖެހިފައިވާ "ބްރޯކެން ހޯސެސް" ގައި ދައްކުވައި ދެނީ އެމެރިކާއި އާއި މެކްސިކޯގެ ބޯޑަރު ކައިރީގައި ހިނގާ ގޭންގް ހަނގުރާމައިގެ ހާދިސާތަކެކެވެ.
އެ ފިލްމުގެ ޓްރެއިލާ ލޯންޗް ކުރަން ބޭއްވި ހަފުލާގައި ނޫސްވެރިން "ބްރޯކެން ހޯސެސް" ގެ ހިންދީ ރިމެކިންއެއް ހެދުމުގެ ހިޔާލެއް ގެންގުޅޭތޯ އެހުމުން ވިންދޫ ބުނީ އެއްވެސް އިރެއްގައި އެފަދަ ހިޔާލެއް ނުގެންގުޅޭ ކަމަށެވެ.
އަދި ފިލްމުގެ ފުރަތަމަ ސްޓޭޖުން ފެށިގެން އެންމެ ފަހު މަރުހަލާ އާ ހަމައަށް ވެސް އޭނާ ބޭނުން ވަނީ އިނގިރޭސި ފިލްމެއް ބެލުންތެރިންނާ ހަމައަށް ގެނެސް ދޭން ކަމަށް ބުންޏެވެ.
މި ފިލްމަށް ތައުރީފްކޮށް "ޓައިޓޭނިކް" އާއި "އެވެޓާ" ފަދަ ފިލްމްތައް ޑައިރެކްޓްކޮށްފައިވާ ޖޭމްސް ކެމެރަން ވެސް ވަނީ ވާހަކަ ދައްކައިފަ އެވެ. އަދި ވިންދޫގެ މަސައްކަތަށް އޭނާ ވަނީ ވަރަށް ބޮޑަށް ހިތްވަރު ދީފަ އެވެ.
ވިންދޫއަކީ ބެލުންތެރިންގެ ވަރަށް ބޮޑު މަގުބޫލް ކަމެއް ހޯދި ފިލްމުތަކެއް ޑައިރެކްޓްކޮށްފައިވާ ކުޅަދާނަ ފަންނާނެކެވެ.
އޭގެ ތެރޭގައި އަނިލް ކަޕޫރާއި މާދުރީ ޑިކްޝިޓާއި ޖެކީ ޝްރޮފް ލީޑް ރޯލް ކުޅުނު "ޕަރިންދާ" އާއި އިންޑިއާ އަށް އިނގިރޭސީންގެ އަތްދަށުން މިނިވަންކަން ލިބުމުގެ ކުރިން ހިނގާ އަސަރު ގަދަ ލީބީގެ ހާދިސާތަކެއް ދައްކުވައިދޭ އަދި އަނިލް އާއި މަނީޝާ ކޮއިރަލާ ލީޑް ރޯލް ކުޅުނު "1942: އަ ލަވް ސްޓޯރީ" އަދި ކަޝްމީރުގައި ހިނގާ ހާދިސާތަކެއް ދައްކުވައިދޭ އަދި ރިތިކް ރޯޝަން އާއި ޕްރިތީ ޒިންތާ މުހިއްމު ރޯލްތައް ކުޅުނު "މިޝަން ކަޝްމީރު" ފާހަގަކޮށްލެވެ އެވެ.