މަސްވެރިންގެ ސަލާމަތާއި ރައްކާތެރިކަމަށް ބޯޓު ބިލްޑިންގް ކޯޑެއް މުހިންމު ކަމަށް ޤައުމީ މަސް ކުންފުނި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް މިފްކޯއިން ބުނެފިއެވެ.
މިފްކޯއިން މިހެން ބުނެފައި މިވަނީ، މިމަހުގެ 10 ވަނަ ދުވަހު މަސްވެރިކަމަށް ނިކުމެ އުޅެނިކޮށް އޯކިޑް 707 ކިޔާ ދޯންޏެއް މެދުން ބިންދައިގެން ދިޔަ ހާދިސާއާއި ގުޅުވައެވެ. މިއީ މަސް ދޯންޏެއް މެދުން ބިންދައިގެން ދިޔަ ފުރަތަމަ ފަހަރެއް ނޫނެވެ. މީގެ ކުރިންވެސް މިފަދަ ހާދިސާތައް ހިނގާފައި އެބަހުއްޓެވެ.
މިފްކޯއިން މިކަމާއި ގުޅިގެން އެކްސް ގައި ކުރި ޕޯސްޓުތަކެއްގައި ބުނީ، މަސްވެރިކަމުގެ ސިނާޢަތުގައި ހަރަކާތްތެރިވާ ދޯނިފަހަރުގެ ސައިޒުން ބޮޑުވެ ގިނަ ވަގުތު ކަނޑުމަތީގައި ހަރަކާތްތެރިވާއިރު ޒަމާނީ ވަސީލަތްތަކާއިއެކު ސައިޒުން ބޮޑެތި ދޯނިފަހަރު މަހަށް ދުރު ހިސާބުތަކަށް ނިކުންނަން ޖެހޭ ކަމަށެވެ. އަދި މަސްވެރިކަމަށް ނުކުންނަ ދޯނިފަހަރުގެ ސަލާމަތާއި ފަޅުވެރިންގެ ރައްކާތެރި ކަމަށް ދޯނިފަހަރު ބަނުމުގައި އިތުރަށް ބަލަންޖެހޭ ކަންކަމަށް ސަމާލުވެ ބޯޓްބިލްޑިންގ ކޯޑެއްގެ ވަރަށް އަވަހަށް މުހިންމު ވެފައިވާ ކަން އެކުންފުނިން ވަނީ ފާހަގަކޮށްފައެވެ.
މަސްވެރިކަމަށް ނުކުންނަ ދޯނިފަހަރުގެ ސަލާމަތާއި ފަޅުވެރިންގެ ރައްކާތެރި ކަމަށް ދޯނިފަހަރު ބަނުމުގައި އިތުރަށް ބަލަންޖެހޭ ކަންކަމަށް ސަމާލުވެ ބޯޓްބިލްޑިންގ ކޯޑެއްގެ މުހިއްމުކަން މިވަނީ އަވަހަށް ބޭނުންވެފައެވެ.
📸: @MasverinOnline pic.twitter.com/zvxnCZKvyq— MIFCO (@mifcomv) November 11, 2023
އަދި އޯކިޑް 707 ދޯނި ބިންދައިގެން ދިއުމަކީ އެކުންފުނިން ކަންބޮޑުވާ ހިތާމަވެރި ހާދިސާއެއް ކަމަށް ބުނިއެވެ.
މީގެ ކުރިން މިއަހަރު ޖެނުއަރީ މަހު މަސްވެރިކަމަށް ނިކުމެ އުޅެނިކޮށް ފަހި ރޯދި ކިޔާ ގއ. ދާންދޫ ދޯންޏެއް ބިންދައިގެން ދިޔައެވެ. މީގެ އިތުރުން އައްޑޫސިޓީ ހިތަދޫ އަށް ނިސްބަތްވާ މޯހިރާ ނަމަކަށް ކިޔާ ދޯންޏެއްވެސް 2021 ވަނަ އަހަރު ޖުލައި މަހުގެ ބިންދައިގެން ދިޔައެވެ. މަހަށް ނިކުމެ އުޅޭ ފަރާތްތަކުން ކަނޑު ގަދަ ދުވަސްވަރަށް ސަލާމުވުމަށް އަބަދުވެސް ކަމާއި ބެހޭ އިދާރާތަކުން އިރުޝާދު ދެއެވެ.