މާދަމާ އޮންނަ ރައްޔިތުން މަޖިލީހުގެ ޖަލްސާއަށް ބަލި ހާލަތު ތަން ނުދޭތީ ހާޒިރު ނުވެވޭނެ ކަމަށް ފިނޭންސް މިނިސްޓަރ އިބްރާހިމް އަމީރު މަޖިލީހަށް އަންގަވައިފިއެވެ.
އަންނަ އަހަރަށް ދައުލަތުން ލަފާ ކުރާ ބަޖެޓު އަދި ސަޕްލިމެންޓަރީ ބަޖެޓު ހުށަހެޅުމަށް މަޖިލީހުގެ ޖަލްސާއެއް މާދަމާ ހެނދުނު 9:00 ޖަހާއިރު ވަނީ އެޖެންޑާ ކޮށްފައެވެ. މި ޖަލްސާގައި ފިނޭންސް މިނިސްޓަރ އިބްރާހިމް އަމީރު އަންނަ އަހަރަށް ދައުލަތުން ލާފާ ކުރާ ބަޖެޓު ހުށަހަޅައި ދިނުމަށް ވަނީ ހަމަޖެހިފައެވެ.
ނަމަވެސް މި ޖަލްސާއަށް ހާޒިރު ނުވެވޭނެ ކަމަށް މިރޭގެ ވަގުތެއްގައި މިނިސްޓަރ އަމީރު ވަނީ މަޖިލީހުގެ ރައީސް، ރައީސް މުހައްމަދު ނަޝީދަށް އެޑްރެސްކޮށް ފޮނުވި ސިޓީއެއްގައި ހާމަކޮށްފައެވެ. އަމީރު ޖަލްސާއަށް ހާޒިރު ނުވެވެނީ ބަލި ހާލަތު ތަން ނުދޭތީ ކަމަށް ހާޒިރު ނުވެވޭ ސަބަބު ބަޔާންކޮށް ސިޓީގައި ވެއެވެ.
"13 ނޮވެމްބަރު 2023 ވާ ހޯމަ ދުވަހު ބޭއްވުމަށް ހަމަޖެހިފައިވާ މަޖިލީހުގެ ޖަލްސާގެ އެޖެންޑާގައި 2024 ވަނަ އަހަރަށް ލަފާކުރާ ބަޖެޓު ހުށަހެޅުއްވުން އޮތް ކަމުގައި ވީ ނަމަވެސް އަޅުގަނޑުގެ ބަލިހާލަތު ހުރި ގޮތުން މާދަމާގެ ރައްޔިތުންގެ މަޖިލީހުގެ ޖަލްސާއަށް ހާޒިރުވެވެން ނެތްވާހަކަ ހިތާމައާއެކު ދެންނެވީމެވެ. " ސިޓީގައި އަމީރު ވިދާޅުވިއެވެ.
މާދަމާ މަޖިލީހުގެ ދެ ޖަލްސާއެއް ވަނީ އެޖެންޑާ ކޮށްފައެވެ. މީގެ ތެރެއިން ބަޖެޓު ހުށަހެޅުމުގެ ޖަލްސާ އެޖެންޑާ ކޮށްފައިވަނީ މަޖިލީހުގެ ރައީސް މުހައްމަދު ނަޝީދު އެދި ލެއްވުމަށް ކަމަށް ވަނީ މަޢުލޫމާތު ލިބިފައެވެ. މީގެ އިތުރުން މަޖީލީހުގެ ރައީސް އިތުބާރު ނެތް ކަމުގެ މައްސަލަ އެޖެންޑާކޮށް މާދަމާ 11:00 ޖަހާއިރު ޖަލްސާއެއް ބޭއްވުމަށް ވަނީ ނިންމާފައެވެ.
މިއަދު ހެނދުނުވެސް މަޖިލީހުގެ ދެ ޖަލްސާއެއް ބޭއްވިއެވެ. ފުރަތަމަ ޖަލްސާގައި ނަޝީދު މައްސަލަ ކުރިއަށް ނުގެންދެވި އެންމެ ފަހުން މަޖިލީހުގެ ރިޔާސަތުގައި ހުންނެވި ވިލިފުށީ ދައިރާގެ މެންބަރު ހަސަން އަފީފް ވަނީ އެ ޤަރާރު ބޭރުކޮށްލާފައެވެ. ދެވަނަ ޖަލްސާއެއް އެޖެންޑާ ކުރުމުން މަޖިލީހުގެ ނައިބް ރައީސް އީވާ ވަނީ ނަޝީދު ޤަރާރު ބޭރުކޮށްލާފައި ވުމުން ކުރިއަށް ނުގެންދެވޭނެ ކަމަށް ބުނެ ޖަލްސާ ނިންމަވާލައްވާފައެވެ.