އަންނަ ހުކުރު ދުވަހު އިންތިހާބީ ރައީސް ޑރ. މުހައްމަދު މުއިއްޒު ހުވާކުރައްވާ ރަސްމިއްޔާތަށް ކުރީގެ ރައީސް އަބްދުﷲ ޔާމީނަށް ވެސް ދައުވަތު ދޭނެ ކަމަށް ރައްޔިތުންގެ މަޖިލީހުގެ އިދާރާ އިން ބުނެފި އެވެ.
އެތަނުން ބުނީ ދައުވަތު މިއަދު ފޮނުވޭވަރު ވާނެ ކަމަށެވެ. ހުވާގެ ރަސްމިއްޔާތަށް ޔާމީނަށް ދައުވަތު ދެނީ ކުރީގެ ރައީސެއްގެ ހައިސިއްޔަތުން ބައިވެރިވެވަޑައގަތުމަށެވެ.
ވ. އާރަށުގެ މައްސަލައިގައި މަނީ ލޯންޑްރިން އާއި ކޮރަޕްޝަންގެ ކުށް ސާބިތުވެ، ޔާމީން 11 އަހަރުގެ ހުކުމެއް ތަންފީޒު ކުރައްވަމުން ގެންދަވާ އިރު، މި ވަގުތު ހުންނެވީ ރަށުބަންދުގަ އެވެ. ޔާމީންގެ ޖަލު ހުކުމަށް ލުއިތަކެއް ލިބުނީ ސެޕްޓެމްބަރު މަހުގެ 30 ގައި ބޭއްވި އިންތިހާބު މުއިއްޒު ކާމިޔާބު ކުރެއްވުމާ ގުޅިގެންނެވެ. އެގޮތުން ފުރަތަމަ ޔާމީން ބަދަލުކުރެއްވީ ގޭބަންދަށެވެ. ނަމަވެސް ފަހުން، ބަންދު ލުއިކޮށް، ރަށުބަންދަށް ބަދަލުކުރީ އެވެ.
އެ ލުޔާ އެކީ ޕީޕީއެމް އޮފީހަށް ވަޑައިގެން ޖަލްސާއެއް ބޭއްވުމާ ގުޅިގެން ކަރެކްޝަނަލް ސާވިސް އިން ވަނީ ސިޔާސީ ކަންކަމުގައި ޔާމީން އުޅުއްވާ ނަމަ، ފިޔަވަޅު އަޅާނެކަމުގެ އިންޒާރު ދީފަ އެވެ. އެހެންވެ އޭގެ ފަހަކުން ސިޔާސީ ހަރަކާތަކުން ޔާމީން ނުފެނެ އެވެ.
ޔާމީނަށް ލުއި ދިނުން އެއީ ވަކި ކަމެކެވެ.
ނަމަވެސް، ރާއްޖޭގެ ރޖ ކަމުގެ މަޤާމުގެ ހުވައި ކުރުމަށް ބާއްވާ ރައްޔިތުންގެ މަޖިލިހުގެ ރަސްމީ ޖަލްސާއެއްގައި، މަޖިލިހުން ދަޢުވަތު ދީގެން، ޙުކުމެއް ތަންފީޛުކުރަމުންދާ މުޖުރިމަކު، ޢިއްޒަތުގައި ބޭންދުން ބަލައެއް ނުގަނެވޭނެއެވެ@mvpeoplesmajlis— Maverick Ibra (@ibramandhu) November 12, 2023
މުއިއްޒު ހުވާކުރެއްވުމުގެ ރަސްމިއްޔާތު ބާއްވަން ހަމަޖެހިފައި ވަނީ ހުކުރު ދުވަހު ހަވީރު ޖުމްހޫރީ މައިދާންގަ އެވެ.
ހުވާގެ ރަސްމިއްޔާތަށް ޔާމީނަށް ދައުވަތުދޭތީ އެމްޑީޕީގެ ކުރީގެ ރައީސް އިބްރާހީމް އިސްމާއީލް (އިބުރާ) އެކަމަށް ފާޑު ވިދާޅުވެފައިވެ އެވެ.