އިންތިހާބީ ރައީސް ޑރ. މުހައްމަދު މުއިއްޒު މިރޭ މީޑިއާތަކާ ބައްދަލުކުރައްވާ ގޮތަށް ހަމަޖެހިއްޖެ އެވެ.
އިންތިހާބީ ރައީސްގެ އޮފީހުން ބުނީ އެ ބައްދަލުވުން އޮންނާނީ ސޯޝަލް ސެންޓަރުގައި 8:30 ގައި ކަމަށެވެ. އެހެންވެ ވީހާ ވެސް ގިނަ މީޑިއާތަކުގެ، ގިނަ ނޫސްވެރިންތަކެއް އެ ބައްދަލުވުމުގައި ބައިވެރިވާނެ އެވެ.
އިންތިހާބަށް ކެމްޕޭން ކުރެއްވި އިރު، ދައުލަތުގެ ބަޖެޓުން މީޑިއާތަކަށް ފައިސާ ދެވޭނެ އިންތިޒާމެއް ހަމަޖައްސަވާނެ ކަމަށް މުއިއްޒު ވިދާޅުވެފައިވެ އެވެ. އެކަމަކު އަންނަ އަހަރަށް އެކުލަވާލައި، މަޖިލީހަށް ފިނޭންސް މިނިސްޓްރީން ފޮނުވާފައި އޮތް ބަޖެޓްގައި މީޑިއާތަކަށް ދޫކުރަން ފައިސާ ހިމަނައިފައެއް ނުވެ އެވެ. ބަޖެޓް އެކުލަވާލީ މުއިއްޒު ބޭނުންވާ ކަންކަމަށް ވެސް ފުރުސަތު ދިނުމަށް ފަހު އެވެ.
އެ މަނިކުފާނު ރައީސްކަމުގެ ހުވާކުރައްވަން ހަމަޖެހިފައި ވަނީ އަންނަ ހުކުރު ދުވަހު އެވެ. އެ ރަސްމިއްޔާތު އޮންނާނީ އެ ދުވަހިހެ ހަވީރު ޖުމްހޫރީ މައިދާނުގަ އެވެ.