އަންހެނުންގެ އުފެއްދުންތެރިކަން އިތުރު ކުރުމަށް އުފައްދާފައިވާ ސަބާ ކޯޕަރޭޓިވް ސޮސައިޓީގައި 915 މެމްބަރުން ތެރެއިން 300 މެމްބަރުންނަކީ އައްޑޫ މީހުން ކަމަށް އިކޮނިމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
އައްޑު އާއި ފުވައްމުލަކަށް އަމާޒުކޮށްގެން ގާއިމު ކުރި ބިޒްނަސް ޑިވެލޮޕްމަންޓް ސާވިސް ސެންޓަރު (ބީޑީއެސްސީ) ހުޅުވަން އިއްޔެ ކައުންސިލް އިދާރާގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ ސަބާގައި ހިމެނޭ 93 ޕަސެންޓް މީހުންނަކީ އަންހެނުން ކަމަށެވެ.
ސަބާގައި ހިމެނޭ 900 އަށް ވުރެ ގިނަ މެމްބަރުންގެ ތެރެއިން ތިންބައި ކުޅަ އެއްބަޔަކީ އައްޑޫ މެމްބަރުންނަށްވުން އެއީ، އަންހެނުން ސަބާގެ މަސައްކަތެއް ދޭ ޝައުގުވެރިކަން ކަމަށް ފާހަގަ ކުރެވެ އެވެ.
މިނިސްޓަރު ވިދާޅުވީ ރައީސް އަބްދުﷲ ޔާމީންގެ ސަރުކާރަކީ އަންހެންނާއި ޒުވާނުން ވިޔަފާރީގެ ތެރެއަށް ވައްދައި، އެ ފަރާތްތައް ކުރިއަރުވަން ވަރަށް ގިނަ މަސައްކަތްތަކެއް ކުރަމުން އަންނަ ސަރުކާރެއް ކަމަށެވެ.
އެގޮތުން ޒުވާންނުން ވިޔަފާރީގެ ތެރެއަށް ވަނުމަށް ލޯން ސްކީމް ތައާރަފުކޮށް، ކުރިއަށް ދެވޭނެ މަގުތައް ފަހިކޮށް ދެއްވަމުން ގެންދަވާ ކަމަށް ވިދާޅުވި އެވބެ.
ސައީދު އަދި ވިދާޅުވީ މި ލޯން ސްކީމްތަކުގެ ތެރެއިން އަންހެނުންނަށް ހާއްސަ އިސް ކަމެއް ވެސް ދޭ ކަމަށެވެ. އެ ސަބަބާ ހުރެ އަންހެނުން ވިޔަފާރީގެ ތެރެއަށް ނިކުމެ، އުފެއްދުންތެރިކަން އިތުރު ކުރަން މަސައްކަތްތަކެއް ކުރަން ޖެހޭ ކަމަށް ވިދާޅުވި އެވެ.
މިނިސްޓަރު ސައީދު ވިދާޅުވީ މި އަހަރުގެ ފަހުކޮޅު އުފެއްދުންތެރި ކަމުގެ މައުރަޒު ވެސް ބާއްވަން ނިންމާފައިވާ ކަމަށެވެ. މި މައުރަޒުގައި ވީހާ ވެސް ގިނަ އަންހެނުން ބައިވެރިވުމަށް މިނިސްޓަރު އިއްޔެ އިލްތިމާސް ކުރެއްވި އެވެ.
މީގެ އިތުރުން ސަބާ ކޯޕަރޭޓިވްގެ މެމްބަރުންނަށް ވަނީ އެ މީހުންގެ އުފެއްދުންތައް ފްލައިޓްތކުގެ ސްކައި ޝޮޕްތަކާއި އެއާޕޯޓްގެ ޑިއުޓީ ފްރީ ފިހާރަތަކުގައި ވެސް ވިއްކޭނެ މަގު ފަހިކޮށް ދީފަ އެވެ.
ސައީދު ކުރިން ވިދާޅުވި ގޮތުގައި ދިވެހި އުފެއްދުންތައް ކުރިއަށް އޮތް ތަނުގައި ވެސް ރާއްޖެ އާއި ބޭރު ގައުމުތަކުގެ ބާޒާރަށް ނެރެ ރަނގަޅު މާކެޓެއް ހޯދައިދޭން މަސައްކަތް ކުރުމަކީ ސަރުކާރުގެ އަމާޒެކެވެ. އަދި ކުރިއަށް އޮތް ތަނުގައި ސަބާ ކޯޕަރޭޓިވް ސޮސައިޓީގެ ޓްރޭޑް ފެސިލިޓޭޝަން ސެންޓަރެއްގެ ބިންގާ ވަރަށް އަވަހަށް އަޅާނެ އެވެ.
އެއީ ސަބާ ކޯޕަރޭޓިވް މެމްބަރުން އެއް ތަނެއްގައި މަސައްކަތް ކުރުމުގެ ފުރުސަތު ފަހިކޮށްދޭން އަޅާ ސެންޓަރެކެވެ.
ސަބާގެ މެމްބަރުންނަކީ މިހާރު ވެސް މި ސަރަހައްދުގެ ގައުމުތަކަށް ޒިޔާރަތްކޮށް، އެ ގައުމުތަކުގެ އަންހެން ވިޔަފާވެރިންނާ އެއްކޮށް މަސައްކަތް ތަޖުރިބާކޮށް، އުފެއްދުންތަކަށް މާކެތް ހޯދުމަށް މަސައްކަތް ކުރަމުން އަންނަ ކޯޕަރޭޓިވްއެކެވެ.