ސަރުކާރުން ހިންގާ މަޝްރޫއުތަކުގެ ތެރެއިން 5 މިލިއަން ރުފިޔާއަށް ވުރެ ބޮޑެތި މަޝްރޫޢުތަކަށް ބީލަން ޕޯޓަލް މެދުވެރިކޮށް ނޫނީ ކުރިމަތި ނުލެވޭ ގޮތަށް މިނިސްޓްރީން ހަދައިފިއެވެ.
ފިނޭންސް މިނިސްޓްރީން މިކަމާއި ގުޅޭ ގޮތުން ނެރުނު ސާކިއުލާގައި ބުނީ، ދައުލަތުން ކުރިއަށް ގެންދާ ޕްރޮކިއުމެންޓުތަކުގެ ތެރެއިން 5 މިލިއަން ރުފިޔާއަށް ވުރެ މަތީގެ ހުރިހާ ޕްރޮކިއުމެންޓެއް ދެން ކުރިއަަށް ގެންދަން ވާނީ ބީލަން ޕޯޓަލް މެދުވެރިކޮށް ކަމަށެވެ. އަދި މިހާރު މިކަމަށް ބޭނުންވާ ބަދަލުތައް ބީލަން ޕޯޓަލްއަށް ގެނެސް ޕޯޓަލް އަޕްގްރޭޑްކޮށްފައިވާ ކަމަށް މިނިސްޓްރީން ބުނެއެވެ.
ސަރުކާރުގެ ބީލަން ޕޯޓަލް އަކީ އޮންލައިން ނިޒާމެއްގެ ތެރެއިން ރައްކާތެރިކަމާއިއެކު ސަރުކާރުގެ ޕްރޮކިއުމެންޓް މަރުހަލާ ކުރިއަށް ގެންދެވޭނެ އިންތިޒާމެއް ހޯދުމަށް 2021 ވަނަ އަހަރުން ފެށިގެން ތަޢާރަފްކޮށްފައިވާ ޕޯޓަލްއެކެވެ.
މި ޕޯޓަލްގައި ސަރުކާރުގެ ބީލަންތަކަށް ކުރިމަތިލާ ފަރާތްތަކުން ރެޖިސްޓްރީ ކުރުމަށް ފަހު، ބީލަން ހުށަހެޅުމުގެ ފުރުސަތު ލިބިގެން ދެއެވެ. އެގޮތުން މިއީ ޒަމާނީ ފެންވަރުގެ އަދި ރައްކާތެރިކޮށް ބީލަން ހުށަހެޅޭނެ ފަސޭހަ ނިޒާމެއް ތަޢަރަފްކުރުމަށް ސަރުކާރުން ފަށާފައިވާ މަޝްރޫޢުއެކެވެ.
މިގޮތުން ބީލަން ޕޯޓަލް މެދުވެރިކޮށް ހުށަހަޅާ ޕްރޮޕޯސަލްތަކުގެ ސިއްރުކަން، ބިޑް ހުޅުވުމުގެ ވަގުތާ ހަމައަށް ހިފެހެއްޓޭއިރު، ބޭރުގެ ފަރާތްތަކަށްވެސް މި ޕޯޓަލް މެދުވެރިކޮށް ބީލަން ހުށަހެޅުމުގެ އިންތިޒާމު ވަނީ ހަމަޖެހިފައެވެ.