ދައުލަތުގެ މީިއާ ޕީއެސްއެމްގެ މެނޭޖިން ޑިރެކްޓަރުގެ މަގާމަށް ޒީނާ ޒާހިރު އައްޔަން ކުރަން ނިންމައިފި އެވެ.
ޒީނާ އަކީ ކުރިން ބައެއް މީޑިއާތަކުގައި މަސައްކަތްކިރެއްވުމަށް ފަހު މޯލްޑިވްސް ބްރޯޑްކާސްޓިން ކޮމިޝަން (އެމްބީސީ) ގެ މެންބަރުކަން ވެސް ކުރައްވާފައިވާ ބޭފުޅެކެވެ.
އޭނަ ޕީއެސްއެމްގެ އެމްޑީއަކަށް އައްޔަންކުރަން ނިންމެވިކަމުގެ އިޝާރާތެއް އިންތިހާބީ ރައީސް ޑރ. މުޙައްމަދު މުއިއްޒު ރޭ މީޑިއާތަކާ އެކީ ބޭއްވި ބައްދަލުވުމުގައި ދެއްވާފައިވެ އެވެ. ނަމަވެސް އެ ހަފުލާގައި ސީދާ ވަކި ބޭފުޅެއްގެ ނަމެއް މުއިއްޒު ވިދާޅެއް ނުވި ނަމަވެސް ޕީއެސްއެމްޑީއަކަށް ވާނީ އަންހެން ބޭފުޅެއް ކަމަށް ވިދާޅުވި އެވެ.
"މި ފަހަރު ވެގެންދާނީ ދައުލަތުގެ މީޑިއާ ކުންފުނި، ޕަބްލިކް ސާވިސް މީޑިއާގެ މެނޭޖިން ޑިރެކްޓަރަކަށް ވެސް ވަޑައިގަންނަވާނީ އަންހެން ބޭފުޅެއް. މި ތަނުގައި އެ ބޭފުޅާ އެބަ އިންނެވި." މުއިއްޒު ވިދާޅުވިއެވެ.
ވަރަށް އިތުބާރު ހުރި ގޮތަކަށް އެނގިފައިވާ ގޮތުގައި މުއިއްޒު އިޝާރާތްކުރެއްވި ބޭފުޅަކީ ޒީނާ އެވެ. އޭނަ އަކީ ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާޒް ހާސިލްކުރައްވައިފައިވާ ބޭފުޅެކެވެ.
ޒީނާ މިހާރު ގެންދަވަނީ "ޒީ ޓައިމްސް" ގެ ނަމުގައި އަމިއްލަ އޮންލައިން މެގަޒިނެއް ހިންގަވަމުންނެވެ.
ޕީއެސްއެމްގެ މިހާރުގެ އެމްޑީ އަލީ އަލީ ހާލިދެވެ.