މަދުވެގެން ސަރުކާރުގެ 8 ކުންފުންޏެއް ހިންގާނީ އަންހެން ބޭފުޅުން ކަމަށް އިންތިހާބީ ރައީސް ޑރ. މުޙައްމަދު މުޢިއްޒު ވިދާޅުވެއްޖެ އެވެ.
އިންތިހާބީ ރައީސް މިހެން ވިދާޅުވީ، ރޭ އެމަނިކުފާނާއި އެމަނިކުފާނުގެ މީޑިއާތަކާ އެކީ ބޭއްވި ބައްދަލުވުމުގައި ވާހަކަ ދައްކަވަމުންނެވެ. އެ ބައްދަލުވުމުގައި މުޢިއްޒު ވަނީ މީޑިއާ ދާއިރާއަށް އެމަނިކުފާނުގެ ވިސްނުންފުޅުގައި ހުރި ކަންކަން ހާމަކުރައްވާފައެވެ. އެގޮތުން މީޑިއާތަކަށް ގިނަ ފުރުސަތުތަކުގެ ސަރުކާރުގެ ހިންގުމުގައި ވެސް އަންހެނުންނަށް މިހާތަނަށް ދެވޭ އެންމެ ބޮޑު ފުރުސަތު ފަހިވެގެންދާނެ ކަމަށް އެމަނިކުފާނު ވިދާޅުވި އެވެ.
އެގޮތުން އަންހެން ބޭފުޅުން ސަރުކާރުގެ މަތީފަޑީގައި އިތުރު ކުރުމަކީ ވީ ވަޢުދެއް ކަމަށާއި، ސަރުކާރުގެ ކުންފުނިތަކުގެ ތެރެއިން މަދުވެގެން 8 ކުންފުންޏެއް ހިންގާނީ އަންހެން ބޭފުޅުން ކަމަށް މުޢިއްޒު ވިދާޅުވި އެވެ.
"މިއީ މިހާތަނަށް [ސަރުކާރެއްގެ އިސް މަގާމުތަކުގައި އަންހެން ބޭފުޅުން ތިއްބަވާނެ] އެންމެ ގިނަ އަދަދު. އަޅުގަނޑަށް މިހާތަނަށް ލިބުނު މަޢުލޫމާތަށް ބަލާއިރު ދެ ކުންފުންޏަށް ވުރެ ގިނައިން އެއްވެސް ސަރުކާރެއްގައި ނެތް އަންހެން ބޭފުޅުން ކުންފުނި ހިންގައިފައެއް،" މުއިއްޒު ވިދާޅުވި އެވެ. "ސަރުކާރުގެ މިނިސްޓްރީތަކުގެ ތެރެއިން ތިން މިނިސްޓްރީއަކަށް، އަދި ކުންފުނިތަކުގެ ތެރެއިން މިހާތަނަށް މަދުވެގެން އަށް ކުންފުންޏަކަށް އަންހެން ބޭފުޅުން ވަނީ ކޮންފާމްކޮށްފައި."
މީގެ އިތުރުން މޯލްޑިވްސް ނޭޝަނަލް ޔުނިވާސިޓީގެ ވައިސް ޗާންސެލަރުކަން ވެސް ކުރައްވާނީ އަންހެން ބޭފުޅެއް ކަމަށް އިންތިހާބީ ރައީސް ވިދާޅުވި އެވެ.
މުއިއްޒު ވިދާޅުވީ އަންހެން ބޭފުޅުންނަކީ ދައުލަތް ހިންގުމުގައި ފުރިހަމަ ހިއްސާ ދެވެން ޖެހޭނެ ބައެއްކަން ޤަބޫލު ކުރައްވާ ކަމަށެވެ. އެހެން ކަމުން އަންނަ އަހަރުގެ މަޖިލީސް އިންތިހާބުގައި ވެސް ވީހާ ވެސް ގިނަ އަންހެން ބޭފުޅުން ކުރިމަތިލުމަށް އެ މަނިކުފާނު އެދިވަޑައިގެންފައިވެ އެވެ.
މުއިއްޒު ރައީސްކަމުގެ ހުވާކުުރައްވާނީ އަންނަ ހުކުރު ދުވަހު ހަވީރު އެވެ.