ދިވެހި ރެޑް ކްރެސެންޓުން ހުޅުވާފައިވާ ފަލަސްތީނު ރިލީފް ފަންޑަށް ލިބުނު ފައިސާގެ ތެރެއިން ފުރަތަމަ ދެ ހަފްތާގައި ލިބުނު ފައިސާ ފަލަސްތީނު ރެޑް ކްރެސެންޓާއި ހަވާލުކޮށްފައިވާ ކަމަށް އެ ޖަމާޢަތުން ބުނެފިއެވެ.
ދިވެހި ރެޑް ކްރެސެންޓުން ފަލަސްތީނު ފަންޑު ހުޅުވާފައިވަނީ، މިދިޔަ މަހުގެ 14 ވަނަ ދުވަހުއެވެ. އެއީ ފަލަސްތީނު ރެޑް ކްރެސެންޓުން ހުޅުވާފައިވާ ޕްރިލިމިނަރީ އިމާޖެންސީ ރިލީފް ފަންޑަށް ޖަމާ ކުރުމަށް ފައިސާ ހޯދުމުގެ ގޮތުންނެވެ. އެގޮތުން ފުރަތަމަ ފަންޑު ހުޅުވާލީ މިދިޔަ އޮކްޓޯބަރ މަހުގެ 28 ވަނަ ދުވަހުގެ ނިޔަލަށް ބަންދު ކުރާ ގޮތަށެވެ. ނަަމަވެސް ފަލަސްތީނަށް ދެމުންދާ ހަމަލާތައް ހުއްޓިފައި ނުވާތީ ނޮވެމްބަރ 12 ވަނަ ދުވަހަށް ފަންޑުގެ މުއްދަތު އިތުރު ކުރެވުނެވެ.
އިތުރު ކުރެވުނު މުއްދަތު ނުލާ ފަންޑަށް 2،105،227.14ރ. ލިބިފައިވާ ކަމަށް ދިވެހި ރެޑް ކްރެސެންޓުން މިވަނީ ހާމަކޮށްފައެވެ. މި ފައިސާ މިމަހުގެ 5 ވަނަ ދުވަހު ފަލަސްތީނުގެ ރެޑް ކްރެސެންޓުގެ އެކައުންޓަށް ޖަމާކޮށްދީފައިވާ ކަމަށް ދިވެހި ރެޑް ކްރެސެންޓުން ނެރުނު ނޫސްބަޔާނުގައި ވަނީ ހާމަކޮށްފައެވެ. އެއީ 136،526 އެމެރިކާ ޑޮލަރު ކަމަށް ދިވެހި ރެޑް ކްރެސެންޓުން ވަނީ ފާހަގަކޮށްފައެވެ.
Press Statement – Maldivian Red Crescent completes the initial tranche of Palestine Relief Fund and closure of Relief fund on 12th November 2023
Read more – https://t.co/BULWXyMSSb pic.twitter.com/8XrJHQKNyf
— Maldivian Red Crescent (@maldivianrc) November 14, 2023
މިމަހުގެ 12 ވަނަ ދުވަހަށް ފަނޑުގެ މުއްދަތު އިތުރު ކުރުމަށް ފަހު މިހާރު ފަންޑު ވަނީ ބަންދުކޮށްފައެވެ. އަދި މިހާރު ކުރިއަށް ދަނީ އެކި ފަރާތްތަކުން ފަންޑަށް ދިން ފައިސާ ޖަމާ ކުރުމުގެ މަސައްކަތް ކަމަށް ދިވެހި ރެޑް ކްރެސެންޓުން ހާމަކުރެއެވެ. އަދި އެ ފައިސާގެ ޖުމްލަ އަދަދު މިމަހުގެ 19 ވަނަ ދުވަހު ހާމަ ކުރާނެ ކަމަށްވެސް އެ ޖަމާޢަތުން ބުނެއެވެ. އަދި މިހާރު އަމާޒަކީ މިފައިސާ ވީހާވެސް އަވަހަށް ފަލަސްތީނު ރެޑް ކްރެސެންޓަށް ފޯރުކޮށް ދިނުން ކަމަށް ދިވެހި ރެޑް ކްރެސެންޓުން ބުނެއެވެ.
ފަލަސްތީނު ރެޑް ކްރެސެންޓަށް ޖަމާ ކުރާ ފައިސާގެ ބޭނުން ހިފަނީ، ހަމަލާތަކުގައި ޒަޙަމްވެފައިވާ ފަރާތްތަކަށް މެދު ނުކެނޑި އެހީ ފޯރުކޮށްދިނުމަށެވެ. މީގެ ތެރޭގައި އުޅަނދުތަކަށް ބޭނުންވާ ތެލާއި ސިއްޙީ ޚިދުމަތައް ބޭނުންވާ ސާމާނާއި، އަދި ހާލުގައި ޖެހިފައިވާ ފަރާތްތަކަށް ކާބޯތަކެތި އަދި ބޯހިޔާވަހިކަން ދިނުމަށް އެހީ ވުމަށް ވަނީ ހަމަޖެހިފައެވެ.