ޕްރަބޫ ދޭވާ ޑައިރެކްޓް ކުރީ "ރަމަޔާ ވަސްތާވަޔާ" އިން ބޮލީވުޑަށް ނިކުތް ގިރިޝް ކުމާރު ތައުރާނީ މިއަދު ކައިވެނިކޮށްފި އެވެ.
އޭނާ ކައިވެނި ކުރީ އަށް އަހަރު ވަންދެން ރައްޓެހިވެގެން އުޅުނު ކްރިސްނާ މަންގްވާނީ އާ އެވެ.
މީޑިއާ ރިޕޯޓްތައް ބުނާ ގޮތުން މި ދެ މީހުންގެ ކައިވެނީގެ ހަފުލާ މިއަދު ބޭއްވި އިރު، ބައިވެރިވެފައި ވަނީ ދެ ފަރާތުގެ އާއިލާގެ މެމްބަރުންނާއި ބައެއް ގާތް ރައްޓެހިން އެކަންޏެވެ.
ގިރިޝްއަކީ ކާމިޔާބު އެތައް ފިލްމެއް މިހާތަނަށް ޕްރޮޑިއުސްކޮށްފައިވާ ރަމޭޝް ތައުރާނީގެ ދަރިއެކެވެ.
މީގެ ދެ އަހަރު ކުރިން ރިލީޒް ކުރި އަދި ބައްޕަ ރަމޭޝް ޕްރޮޑިއުސް ކުރި "ރަމަޔާ ވަސްތާވަޔާ" އަށް ފަހު ގިރިޝްގެ އެއްވެސް ފިލްމެއް މިހާތަނަށް ބެލުންތެރިންނާ ހަމައަށް އައިސްފައެއް ނުވެ އެވެ.
އެހެން ނަމަވެސް އޭނާ ދެވަނަ ފިލްމެއްގެ މަސައްކަތް މިހާރު ކުރަމުން އަންނަ ކަމަށް ރިޕޯޓްތައް ބުނެ އެވެ. އެ ފިލްމް ޑައިރެކްޓް ކުރަނީ ވައިބާވް މިސްރާ އެވެ.
އެކަމަކު އެ ފިލްމާ ބެހޭ އެއްވެސް ތަފުސީލެއް މިހާތަނަށް ހާމަކޮށްފައެއް ނުވެ އެވެ.
ބައެއް މީޑިއާ ރިޕޯޓްތައް ބުނާ ގޮތުން އެ ފިލްމުގެ ޝޫޓިން ނިންމާލުމަށް ފަހު، ކައިވެނީގެ އުފަލުގައި ގިރިޝް ވަރަށް ކުލަ ގަދަ ބޮޑު ރަސްމިއްޔާތެއް ބާއްވާނެ އެވެ.