ރައްޔިތުންގެ މަޖިލީހަށް ހުށައެޅުމަށްޓަކައި ތިން ބިލެއް ރައީސް އޮފީހަށް ފޮނުވައިފި އެވެ.
އެޓާނީ ޖެނެރަލްގެ އޮފީހުން ރައީސް އޮފީހަށް ފޮނުއްވާފައިވާ ބިލްތަކަކީ ޒަކާތާބެހޭ ބިލަކާއި، މެރިން ސްޕޭޝަލް ޕްލޭނިންއާ ބެހޭ ބިލަކާއި، މަސްތުވާތަކެއްޗާ ބެހޭ ޤާނޫނަށް އިޞްލާޙު ގެނައުމުގެ ބިލެވެ.
އޭޖީ އޮފީހުން ބުނީ ސަރުކާރުން މަޖިލީހަށް ހުށަހަޅާފައިވާ 30 ބިލެއްގެ މަސައްކަތް އެކި މަރުޙަލާތަކުގައި މިހާރު ވެސް ކުރިއަށްދާ ކަމަށެވެ. މީގެ ތެރޭގައި ޢާއްމު އިޖުތިމާޢީ އެކި ދާއިރާތަކާއި ގުޅޭ ބިލްތަކުގެ އިތުރުން ރާއްޖޭގައި ޢަދުލު އިންސާފު ޤާއިމުކުރުމުގެ ދާއިރާ ހަރުދަނާކުރުމަށް ކޮންމެހެން އިސްލާޙު ކުރަން ޖެހޭ ބިލްތަކެއް ހިމެނެ އެވެ.
އެގޮތުން މަޖިލީހުގެ އެކި ކޮމިޓީތަކުގައި 20 ބިލެއްގެ މަސައްކަތް ކުރިއަށްދާ އިރު ދެ ބިލެއްގެ އިބުތިދާއީ ބަހުސް ކުރިއަށްދާ ކަމަށް އޭޖީ އޮފީހުން ބުންޏެވެ. އަދި ތިން ބިލެއްގެ ފުރަތަމަ ކިޔުން އިއްވާފައިވާއިރު، ފަސް ބިލެއް މަޖިލީހުގެ އިދާރާގައި އޮތް ކަމަށް ވެސް އޭޖީ އޮފީހުން ފާހަގަކުރެ އެވެ.
އެ އޮފީހުން ބުނީ ނޮވެމްބަރު 17، 2018 އިން ފެށިގެން މިހާތަނަށް ސަރުކާރުގެ ފަރާތުން ރައްޔިތުންގެ މަޖިލީހަށް 153 ބިލް ހުށައަޅާފައިވާ ކަމަށެވެ. އޭގެ ތެރެއިން 120 ބިލެއް މަޖިލީހުން ފާސްކޮށް ރައީސް އިބްރާހީމް މުހައްމަދު ސޯލިހު ތަސްދީގު ކުރައްވާފައިވެ އެވެ.