ރާއްޖޭގެ ޓޫރިޒަމް ފުޅާ ކުރުމުގެ ގޮތުން އައްޑޫގައި ވެސް "ތުބުރި ޕްރޮޖެކްޓް" ފަދަ ގެސްޓްހައުސް ޕްރޮޖެކްޓްތައް ހިންގަން ނިންމާފައިވާ ކަމަށް ޓޫރިޒަމް މިނިސްޓަރު އަހުމަދު އަދީބު ވިދާޅުވެއްޖެ އެވެ.
ނޫސްވެރިންނާ ބައްދަލު ކުރައްވައި އަދީބު ވިދާޅުވީ މި ޕްރޮޖެކްޓް ހިންގުމަށް އައްޑު އާއި ހއ. ކެލާގައި ކަމަށެވެ.
"މިހާރު އޭގެ ކުރެހުންތައް ކުރެހުމުން ދަނީ ހއ. ކެލާ އަދި އައްޑޫ، އަތޮޅު ނޯތާއި ސައުތަށް ފޯކަސްކޮށްގެން. މިހާރު އެބަގެންދަން އޭގެ މަސައްކަތްތައް ކުރިޔަށް،" އޭނާ ވިދާޅުވި އެވެ.
މިނިސްޓަރު ވިދާޅުވީ ވަރަށް އަވަހަށް އެ ޕްރޮޖެކްތައް ލޯންޗް ކުރެވޭނެ ކަމަށެވެ. އެހެންވެ އެކަމާ ބެހޭ މާ ބޮޑު ތަފުސީލަކަށް މިނިސްޓަރު ވަޑައެއް ނުގަންނަވަ އެވެ.
އައްޑޫ ސިޓީ ކައުންސިލުން ވެސް ވަނީ ދޮޅު އަހަރުގެ ތެރޭގައި 2،000 ގެސްޓް ހައުސް ތަރައްގީ ކުރަން "އައްޑޫ ގެސްޓް ހައުސް ވެންޗާ" ގެ ނަމުގައި މަޝްރޫއެއް ފަަށައިފަ އެވެ.
މީގެ އިތުރުން ގެސްޓް ހައުސް ތަރައްގީ ކުރަން ބޭނުންވާ ފަރާތްތަކަށް 20،000 އަކަފޫޓްގެ ބިން ކުއްޔަށް ދޫކުރާ ޕްރޮޖެކްޓަކަށް ވެސް މިހާރު ވަނީ ހުޅުވާލައިފަ އެވެ.
އެ މަޝްރޫއުގެ ދަށުން ބީން ދޫކުރަނީ ފޭދު އާއި މަރަދޫގެ އިތުރުން ހުޅުމީދޫންނެވެ.