ފްލެޓާ ގުޅޭ ހުރިހާ ކަމެއް ހުއްޓާލަން އަންގައިފި

ގެދޮރުވެރިޔާ ސްކީމުގެ ދަށުން ކުރިއަށްދާ ފްލެޓު ދިނުމުގެ ހުރިހާ ކަމެއް ހުއްޓާލުމަށް އެންޓި ކޮރަޕްޝަން ކޮމިޝަނުން (އޭސީސީ) އިން އަންގައިފިއެވެ.

އޭސީސީން މިގޮތަށް އަންގާފައިވާއިރު، ފްލެޓު ލިބުނު 4000 މީހުންގެ މެދުގައި މިރޭ ވަނީ ގުރު ނެގުން ކުރިއަށް ގެންގޮސްފައެވެ. އަދި ގުރުން ހޮވުނު ފަރާތްތަކަށް ލިބުނު ފްލެޓުތައް މިހާރު ގެދޮރުވެރިޔާ ޕޯޓަލް އިން ފެންނަން ހުރި ކަމަށް ފްލެޓު ލިބުނު ފަރާތްތަކުން އައްޑޫލައިވްއަށް ވަނީ ކަށަވަރު ކޮށްދީފައެވެ. އޭސީސީން މިގޮތަށް އަންގާފައިވަނީ ފްލެޓު ލިބޭ މީހުންގެ ދައިމީ ލިސްޓު މިރޭ އިއުލާންކޮށްފައި ވަނިކޮށެވެ.

ލިސްޓަށް އައިސްފައިވާ ބަދަލާއެކު ފުރަތަމަ ބުރުގައި 3 ކޮޓަރީގެ ފުލެޓް ލިބެނީ 76 އިން ފެށިގެން މަތިން މާކްސް ލިބިފައިވާ ފަރާތްތަކަށް ފުލެޓް ނެގުމަށްފަހު ބާކީވާ ފުލެޓްތައް 75 މާކްސް ލިބިފައިވާ ފަރާތްތަކުގެ ތެރެއިން ގުރުއަތަކުން ހޮވޭ ފަރާތްތަކަށް ކަމަށް މިނިސްޓްރީން ބުނެ އެވެ. އަދި ފުރަތަމަ ބުރުގައި 2 ކޮޓަރީގެ ފުލެޓް ލިބެނީ 73 އިން ފެށިގެން މާތިން މާކްސް ލިބިފައިވާ ފަރާތްތަކަށް ކަމަށްވެސް މިނިސްޓްރީން ބުނެފައިވެ އެވެ.

ގެދޮރުވެރިޔާ ސްކީމަށް ފޯމު ހުށަހަޅާފައިވާ ފަރާތްތަކުގެ ތެރެއިން ދެމަފިރިން ފުލެޓް ލިބުމަށް ހޮވިފައިވާނަމަ ފުލެޓް ލިބޭނީ ދެމަފިރިންނަށް 1 ފުލެޓް ނުވަތަ ދެމަފިރިންގެ ތެރެއިން ކަނޑައަޅާ އެއްފަރާތަކަށް 1 ފުލެޓް އެވެ. ފުލެޓް ލިބުމަށް ހޮވިފައިވާ ފަރާތްތަކަށް ލިބޭ ފުލެޓް ކަނޑައެޅުމަށް ހަމަޖެހިފައިވަނީ ގުރުއަތު ނަގައިގެންނެވެ.

ގެދޮރުވެރިޔާ ސްކީމުން ދޫކުރުމަށް ހަމަޖެހިފައިވާ 3 ކޮޓަރީގެ ފުލެޓްގެ މަހު ކުއްޔަކީ 7000ރ އާއި މަރާމާތު ފީގެ ގޮތުގައި މަހަކު 1000ރ އެވެ. އަދި 2 ކޮޓަރީގެ މަހު ކުއްޔަކީ 5000ރ އާއި މަރާމާތު ފީގެ ގޮތުގައި މަހަކު 1000ރ އެވެ. ކުލި ދެއްކުމަށް ފެށުމަށް ހަމަޖެހިފައިވަނީ ފުލެޓް ޙަވާލުކުރާ ތާރީހުން ފެށިގެން 3 ދުވަހުގެ ގްރޭސް ޕީރިއަޑް އަކަށްފަހު އެވެ. އަދި ކުލި ދައްކަންޖެހޭ ޖުމްލަ މަހުގެ އަދަދަކީ 300 މަހެވެ.