ހައި ކޯޓުގެ ފަނޑިޔާރުކަމުގެ މަގާމަށް ޢަބްދުލްމާނިޢު ޙުސައިން ޖުޑިޝަލް ސާވިސް ކޮމިޝަން (ޖޭއެސްސީ) އިން އައްޔަންކޮށްފި އެވެ.
އެތަނުން ނެރުނު ބަޔާނެއްގައި ބުނީ ފަނޑިޔާރުކަމުގެ މަގާމަށް މާނިއު އައްޔަންކުރަން ނިންމީ ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީން އިންޓަވިއުކުރުމަށް ފަހު އޭނާ ފަނޑިޔާރު ކަމަށް ޢައްޔަންކުރުމަށް ކޮމިޓީން ލަފާ އަރުވާފައިވާތީ ކަމަށެވެ. އަދި މާނިއު ފަނޑިޔާރުކަމުގެ މަޤާމަށް އައްޔަންކުރަން ނިންމީ އިއްޔެ ބޭއްވި އެ ކޮމިޝަނުގެ ބައްދަލުވުމުގަ އެވެ.
މާނިއު އަކީ ކުއްލިއްޔަތުއް ދިރާސާތިލް އިސްލާމިއްޔާއިން ޝަރީޢަތާއި ޤާނޫނުން ބެޗެލާސް ޑިގްރީ ޙާސިލްކުރައްވައި، ވިލާ ކޮލެޖުން މާސްޓަ އޮފް ޝަރީޢާ އެންޑް ލޯ ޙާސިލްކުރައްވާފައިވާ ބޭފުޅެކެވެ. އޭނަ 2013 ވަނަ އަހަރުން ފެށިގެން ވަކީލުކަމުގެ ވަޒީފާ އަދާކުރައްވާފައިވާއިރު ޝަރުޢީ ދާއިރާގައި 9 އަހަރު ދުވަހުގެ ތަޖުރިބާ ލިބިފައިވެ އެވެ.
ހައި ކޯޓްގެ ފަނޑިޔާރު ކަމަށް މާނިއު އައްޔަންކުރަން ނިންމި އިރު، އޭނަ އެ މަގާމަށް ކުރިމަތިލެއްވީ ޖޭއެސްސީގެ މެންބަރުކަމުން މިދިޔަ އާދީއްތަ ދުވަހު އިސްތިއުފާ ދެއްވުމަށް ފަހު އެވެ.
މާނިއުގެ އިތުރުން ފަސް ބޭފުޅަކު ހައި ކޯޓްގެ ފަނޑިޔާރު ކަމަށް ކުރިމަތިލެއްވި އެވެ.