ހިޔާ ފްލެޓް ސަރަހައްދުގެ ބީޗާއި ދިމާލައް ތިބި ހުސްބިންތަކުގައި ހަދާފައިވާ ހަޓުތަކާއި އެހެނިހެން ތަކެތި އަންނަ ހޮނިހިރު ދުވަހުގެ ކުރިން ނެގުމަށް އާބަންކޯއިން އަންގައިފިއެވެ.
އާބަންކޯއިން މިކަމާއި ގުޅިގެން ކޮށްފައިވާ އިއުލާނުގައި ބުނީ، ހުޅުމާލެ ފޭސް 2 ގެ ހިޔާ ޓަވަރު 12 ކައިރީ ބީޗް ސަރަހައްދަށް ވާގޮތަށް ތިބި ހުސްބިންތަކުން ހަޓުތަކާއި، ބިންތަކުގައި ޖަހާފައިވާ ގޮނޑި މޭޒު އަދި އެހެނިހެން ތަކެތި ނެގުމަށް އަންގާ ކަމަށެވެ. މިތަކެތި ނެގުމަށް އަންގާ ދީފައިވަނީ 10 ދުވަހުގެ މުއްދަތަކެވެ. އެގޮތުން އަންނަ ހަފްތާގެ ހޮނިހިރު ދުވަސް ނުވަތަ ނޮވެމްބަރު 25 ވަނަ ދުވަހުގެ ނިޔަލައް އެތަކެތި އެ ސަރަހައްދުން ނެގުމަށް ވަނީ އަންގާފައެވެ.
އަދި މިމުއްދަތުގައި އެތަކެތި ނުނަގައިފިނަމަ އާބަންކޯއިން އެތަކެތި ނެގުމުގެ މަސައްކަތް ކުރިއަށް ގެންދާނެ ކަމަށް އެކުންފުނިން ވަނީ ބުނެފައެވެ. އަދި އެހާލަތުގައި އެއްވެސް މުދަލަކަށް ލިބޭ ގެއްލުމަކަަށް ޒިންމާ ނުވާނެ ކަމަށް އެކުންފުނިން ވަނީ ބުނެފައެވެ.
އެކޯޕަރޭޝަނުން މިގޮތަށް އަންގާފައިވާއިރު، އެ ސަރަހައްދުގައި ހަޓުތައް ޖަހައި ގާޑިޔާ ހަދައިގެން އާންމުން ދަނީ ވިޔަފާރި ކުރަމުންނެވެ. މިގޮތަށް ޖަހާފައިވާ ބައެއް ތަންތަން ހުރީ އާބަންކޯއިން ދޫކޯށްފައިވާ ބިން ތަކުގައެވެ. އެހެން ކަމުން އެތަނުން އެތަކެތި ނެގުމަށް އާބަންކޯއަށް މީގެ ކުރިން ޝަކުވާވެސް ހުށަހަޅާފައި އެބަހުއްޓެވެ.