ރައީސްކަމުގެ ހުވާ މިއަދު ކުރައްވާ ޑރ. މުހައްމަދު މުއިއްޒުގެ ސަރުކާރުގެ ކެބިނެޓަށް އައްޔަންކުރާ ވަޒީރުން މިރޭ މަގާމުގެ ހުވާކުރައްވާ ގޮތަށް ހަމަޖެހިއްޖެ އެވެ.
ރައީސް އޮފީހުން މިއަދު ބުނީ ކެބިނެޓަށް އައްޔަންކުރައްވާ ވަޒީރުން ހުވާކުރެއްވުމާއި އެ ބޭފުޅުންނަށް މަގާމުގެ ފަތްކޮޅު ދެއްވުމުގެ ރަސްމިއްޔާތު އޮންނާނީ މިރޭ 7:45 ގައި ކަމަށެވެ. މީގެ އިތުރުން ރައީސް އޮފީހުގެ އެންމެ އިސް މަގާމުތަކަށް ޢައްޔަން ކުރައްވާ ބޭފުޅުންނަށް މަގާމުގެ ފަތްކޮޅު ދެއްވުން ވެސް މިރޭ އޮންނާނެ އެވެ.
މުއިއްޒު ވިދާޅުވެފައިވާ ގޮތުގައި ކެބިނެޓްގައި ހިމެނިވަޑައިގަންނަވާނީ 22 ވަޒީރުންނެވެ. އަދި އެއީ ތައުލީމީ ގާބިލު ބޭފުޅުން ކަމަށް ވިދާޅުވި އެވެ.
މުއިއްޒު ހުވާކުރެއްވުމުގެ ރަސްމިއްޔާތު އޮންނާނީ މިއަދު ހަވީރު ޖުމްހޫރީ މައިދާންގަ އެވެ.