ރައީސް އިބްރާޙީމް މުހައްމަދު ސާލިޙް ވެރިކަން ނިންމަވާލެއްވީ ދިވެހި ޚަޒާނާއަށް ދަތިކޮށްފައި ކަމަށް، ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ރައީސް ސޯލިޙްއާއި އެމްޑީޕީ ދައުރު ނިންމާލީ، މަދުން ނޫނީ ދިވެހި ވެރިކަމެއްގައި ދިވެހި ޚަޒާނާއަށް އަށް ދަތި ނުކުރާވަރަށް ދަތިކޮށްފައި ކަމަށެވެ. އަދި މިހާރު ދިވެހިން މިތިބީ ވަރަށް ނާޒުކު ފައްތަރެއްގައި ކަމަށް ރައީސް ނަޝީދު ވިދާޅުވިއެވެ.
" އަޅުގަނޑުމެން މިތިބީ ވަރަށް ނާޒުކު ފައްތަރެއްގައި. ޑރ. މުޢިއްޒުއަށް ވެސް ބަޖެޓް ސަޕޯޓް ހޯދަން ދަތިވާނެ. ޑިސެމްބަރު މަސް ވާނީ އުނދަގޫ މަހަކަށް " މައްޗަންގޯޅި މެދު ދައިރާގެ މެންބަރުކަންވެސް ކުރައްވާ ރައީސް ނަޝީދު ވިދާޅުވިއެވެ.
Raees Solih aai MDP dhauru mi ninmanee madhun noonee Dhivehi verikameh Dhivehi khazaanaa ah dhathi nuvaa minvarah dhathi kohfai. Alhugadumen mithibee varah naazuku fahtharehgai. Dr. Muizzu ahves avahah budget support hoadhaan dhathi vaane. December vaanee undhagoo mahakah.
— Mohamed Nasheed (@MohamedNasheed) November 17, 2023
ވެރިކަމަށް ވަޑައިގަތްއިރު އެކުވެރިކަމުގެ މިސާލެއްގެ ގޮތުގައި ގިނަ ބަޔަކު ފާހަގަ ކުރެއްވި ދެ ބޭފުޅުންގެ ދެމެދު ވެރިކަމާއި ގުޅޭގޮތުން ޙިޔާލު ތަފާތުވުން ވަރަށް ބޮޑަށް އުފެދިގެން ދިޔައެވެ. އޭގެ ފަހުން ނަޝީދު އެމްޑީޕީ ރައީސް ކަމުގެ މަޤާމުގައި ހުންނެވުމަށް ފަހު މަޤާމު ދޫކުރައްވައި، އަމިއްލަފުޅަ އިސްނަންގަވައިގެން އުފެއްދެވި ދަ ޑިމޮކްރެޓްސް ޕާޓީއާއި ގުޅިވަޑައިގެންނެވިއެވެ.
މިއަހަރުގެ ބާކީ ދުވަސްތައް އުނދަގޫވާނެ ކަމަށް ނަޝީދު ވިދާޅުވިއުރު، ނިމިގެން މިދިޔަ އެމްޑީޕީ ސަރުކާރުގައި ފިނޭންސް މިނިސްޓަރ ކަން ކުރެއްވި އިބްރާހީމް އަމީރު ވަނީ ސަޕްލިމެންޓަރީ ބަޖެޓުގެ ތެރެއިން ބާކީ 200 މިލިއަން ޑޮލަރު ހޯދަން ޖެހޭކަން ފާހަގަކޮށްފައެވެ. އަދި ނުހޯދައިފި ނަމަ ދައުލަތުގެ ރިޒާވަށް ވަރަށް ބޮޑަށް އަސަރު ކުރާނެ ކަމަށް ވިދާޅުވިއެވެ.
ނަމަވެސް އެއަދަދު ލިބޭނެ ކަމުގެ ޔަޤީންކަން އަމީރު ނުދެއްވައެވެ. އަމީރު ވިދާޅުވީ މަޝްވަރާ ކުރެވުނު ކަމަށާއި، ފެހި ސިގްނަލްތަކެއް ލިބިފައިވާ ކަމަށެވެ. އެހެން ކަމުން އެއަދަދު ހޯދުމަށް މަސައްކަތް ކުރަން އޮތީ މިއަދު ހަވާލުވާ ސަރުކާރަށެވެ.