ރައީސްކަމުގެ ހުވާ އިއްޔެ ކުރެއްވި ރާއްޖޭގެ އާ ރައީސް ޑރ. މުހައްމަދު މުއިއްޒު މި ވަގުތު އަދި އަމިއްލަ ގެކޮޅު މ. ދިމްޔާތު ގޭގައި އުޅުއްވާ ގޮތަށް ނިންމަވައިފި އެވެ.
އެގޮތަށް ނިންމީ ރިޔާސީގަނޑުވަރު ކަމަށްވާ މުލިއާގޭގެ މަރާމާތުގެ މަސައްކަތްތަކެއް މިހާރު ކުރިއަށްދާތީ އެވެ. އެތަނުގައި އެންމެ ފަހުން ދިރިއުޅުއްވީ ވެރިކަމުގެ ދައުރު އިއްޔެ އަށް ހަމަވަޑައިގަތް ރައީސް އިބްރާހީމް މުހައްމަދު ސޯލިހެވެ. ވެރިކަން ނިމުމަކަށް ގާތްވުމާ ގުޅިގެން ރައީސް ސޯލިހު މުލިއާގެއިން ނުކުމެވަޑައިގެންނެވީ މި މަހުގެ 10 ގަ އެވެ.
ސަރުކާރުގެ އޮފިޝަލަކު ވިދާޅުވީ މުލިއާގޭގައި ކުރިއަށްދާ މަރާމާތުގެ މަސައްކަތްތައް ނިމެންދެން އަމިއްލަ ގެކޮޅުގައި ރައީސް ދިރިއުޅުއްވި ނަމަވެސް، އެކިއެކި ބައްދަލުވުންތައް މުލިއާގޭގައި ރައީސް ކުރިއަށް ގެންދަވާނެ ކަމަށެވެ.
މުލިއާގެ ރައީސަށް ހާއްސަވާ އިރު، ހިލާލީގެ ހާއްސަ ވަނީ ނައިބު ރައީސަށެވެ. އާ ސަރުކާރުގެ ނައިބު ރައީސަކީ ފަރެސްމާތޮޑާ ދާއިރާގެ ކުރީގެ މަޖިލިސް މެންބަރު މުހައްމަދު ހުސައިން ލަތީފު (ސެމްބެ) އެވެ.