އިންތިޤާލީ އިންސާފުގެ އޮފީސް ބަންދުކޮށް އެތަނުގައި ހުރި ލިއެކިއުންތައް ފިނޭންސް މިނިސްޓްރީއާއި ހަވާލު ކުރުމަށް އަންގާފައިވާ ކަމަށް އެ އޮފީހުން ހާމަކޮށްފިއެވެ.
އެ އޮފީހުން އީއްޔެ ނެރުނު ނޫސްބަޔާނެއްގައި އެ އޮފީހުގެ މުއްދަތު 17 ނޮވެމްބަރު 2023 އަށް ހަމަވެފައިވާތީ، އެ އޮފީސް އުވިގެންދާއިރު އޮފީހުގެ ހަރު މުދަލާއި އެންމެހައި ލިއެކިއުންތައް ފިނޭންސް މިނިސްޓްރީއާއި ހަވާލު ކުރުމަށް، ފިނޭންސުން އަންގާފައިވާކަމަށް އެ އޮފީހުން ބުނެއެވެ.
އެއޮފީސް މުއްދަތު ހަމަވެ އުވާލާއިރު، އެ އޮފީހަށް ގިނަ މައްސަލަތަކެއް ވަނީ ހުށަހެޅި ބަލަން ފަށާފައެވެ. ނަމަވެސް އޮފީހުން ގިނަ ޙަރަދުތަކެއް ކޮށްގެންވެސް ބޮޑެތި މައްސަލަތަކެއް ނިންމިފައިއެއް ނުވައެވެ. އެ އޮފީސް ފުރަތަމަ ހުޅުވި މުއްދަތު މިދިޔަ އަހަރު ނޮވެމްބަރު 17 އަށް ވަނީ ހަމަވެފައެވެ. ނަމަވެސް އޭގެ ފަހުން މުއްދަތު އިތުރު ކުރިއެވެ.
އެ އޮފީހުގެ މައްސަލަތައް ނުނިމި ހުރިއިރު، ދާދި ދަހުން އެންޓި ކޮރަޕްޝަން ކޮމިޝަނުން ވަނީ ކޮރަޕްޝަނަށް މަގުފަހިވާ ކަމަށް ބުނެ އެ އޮފީހަށް ވަދެފައެވެ. އޭސީސީން ވަނީ އެ އޮފީހުން އޭސީސީގެ ތަހުޤީގައް އެއްބާރުލުން ދިނީ ތިން މުވައްޒަފަކު ކަމަށް ބުނެފައެވެ. އަދި ތަހުޤީޤައް ހުރަސް އެޅިކަމަށް އެ ކޮމިޝަނުން ބުނެއެވެ.