މޯލްޑިވްސް އިސްލާމިކް ބޭންކް (އެމްއައިބީ) "ފައިސާ ނެޓް" ނަމުގައި އިންޓަނެޓް ބޭންކިން ހިދުމަތް ތައާރަފްކޮށްފި އެވެ.
އެ ހިދުމަތް މިއަދު އިފްތިތާހުކޮށް ދެއްވީ މަރުކަޒީ ބޭންކް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަޒީމާ އާދަމެވެ.
ހިދުމަތް ތައާރަފް ކުރުމަށް ފަހު އަޒީމާ ވިދާޅުވީ ފައިސާ ނެޓް ހިދުމަތަކީ ކަސްޓަމަރުންނަށް ވަރަށް މުހިއްމު ހިދުމަތަކަށް ވާނެ ކަމަށެވެ.
އެމްއައިބީގެ މެނެޖިން ޑިރެކްޓަރު ހާރިސް ހާރޫން ވިދާޅުވީ އޮންލައިން ހިދުމަތް ބޭނުން ކުރަން ކަސްޓަމަރުންނަށް ވަރަށް ފަސޭހަ ވާނެ ކަމަށެވެ.
އޭނާ ވިދާޅުވީ އޮންލައިން ބޭންކިން ހިދުމަތަށް ރަޖިސްޓްރީ ކުރާކަށް ބޭންކަށް ދާން ނުޖެހޭނެ ކަމށާއި އިސްލާމިކް ކަސްޓަމަރުންނަށް މިހާރު ވެސް އޮންލައިންކޮށް ރަޖިސްޓްރީ ކުރެވޭނެ ކަމަށެވެ.
އިންޓަނެޓް ބޭންކިންގައި ދެ ޕެކޭޖެއް ހިމެނެ އެވެ. އެއީ ބޭސިކް ޕެކޭޖާއި ޕްރިމިއަމް ޕެކޭޖެވެ.
ބޭސިކް ޕެކޭޖް ހުރިހާ ކަސްޓަމަރުންނަށް ވެސް ހިލޭ ލިބޭނެ އެވެ. މި ހިދުމަތް މެދުވެރިކޮށް ބެލެންސް ބެލުމާއި، އަމިއްލަ އެކައުންޓްތަކުގެ މެދުގައި ފައިސާ ޓްރާންސްފާ ކުރުމާއި، އަދި ޗެކްފޮތަށް އެދުން ފަދަ ހިދުމަތްތައް ލިބޭނެ އެވެ.
"ފައިސާ ނެޓް" ގެ އެޕްލިކޭޝަނެއް ވެސް މިހާރު އެޕަލް ސްޓޯރާއި ގޫގުލް ޕްލޭ އިން މިހާރު ޑައުންލޯޑް ވެސް ކުރެވޭނެ އެވެ.
އޮންލައިން ބޭންކިން އިތުރަށް ފުޅާކޮށް އެ ހިދުމަތުގެ ތެރެއިން ބިލްތައް ދެއްކުމާއި ޒަކާތް ދެއްކޭނެ ނިޒާމެއް މިއަހަރު ނިމުމުގެ ކުރިން ގާއިމު ކުރަން ވެސް އެމްއައިބީން ވަނީ ނިންމައިފަ އެވެ.
އެމްއައިބީގެ ބްރާންޗެއް މާލޭގެ އިތުރުން އައްޑޫ ހިތަދޫގައި ވެސް ހުރެ އެވެ. އައްޑޫ ބްރާންޗް ހުޅުވީ މާޗް 25، 2014 ގަ އެވެ.